كشف الإعلامي إبراهيم فايق، حقيقة وجود عروض لـ إمام عاشور، لاعب الأهلي، بعد تمرده وتوقيع غرامة عليه وايقافه لمدة اسبوعين.
وقال فايق، خلال تصريحات تليفزيونية عبر برنامج “الكورة مع فايق”، على قناة” ام بي سي مصر 2″:” فيما يخص موضوع إمام عاشور، كنا قولنالكم إنه اللاعب مأخدش إذن أي حد خالص وإنه هيتعرض لعقوبة مغلظة وقد كان.. النادي الأهلي أعلن عن العقوبة”.
وأضاف:” الحقيقة إنه أي محاولة منطقية لوضع أسباب منطقية للأمور اللامنطقية اللي عملها إمام عاشور هي قمة العبث”.
وشدد فايق:” يعني تعالى نشوف هو أصله عمل مع محمد هاني كدة فهو زعل؟ لا ده هو أخد موقف؟ لا ده عرض أمريكا؟ لا اسمع.. ده السعودية؟ لا لا ده مش كدة ولا كدة خالص، ده أنت مش فاهم ده الموضوع بتاع ضربة الجزاء اللي قبليها.. لا لا لا ولا ده ولا ده ولا ده.. زيزو وتريزيجيه”…
وتابع:” كلها محاولات منطقية بالمناسبة يعني ناس عايزة تحط إيه؟ تحط واحد اتنين تلاتة أربعة لكن إمام مجاش.. ودي بشوفها حاجة عبثية جداً من النتيجة واحدة بتتحلل إيه؟ كان في إيه؟ كان في كارثة”.
وزاد فايق:” ناس تصحى الصبح واحد من أهم لعيبة الدوري المصري نجم فرقته مفيش وصول له مفيش وجود له.. فواحدة من الأمور اللي أنت عمال إيه ده؟ محدش عارف حاجة.. مفيش معلومة عند أي حد.. أي حد معندوش معلومة كله عمال بيلف حوالين بعضه محدش عارف أي حاجة خالص.. فالنتيجة خطر.. نتيجة كارثية بتحلل بتحط أسباب لإيه؟ أنت عندك لعيب مراحش”.
و أردف:” أنا عندي سيستم تم اختراق السيستم ده أو خرق السيستم ده بشكل أو بآخر. حاجة غريبة جداً لعيب محدش عارف منه أي حاجة، فكان قرار النادي الأهلي حازم جداً وحاسم جداً مادية وعقوبة وتدريبات انفرادية”.
وواصل فايق: “جمهور الأهلي عنده طبيعة يا باشا.. أنت هتديني كورة أنت ملتزم وجامد أنا هخليك تطلع بص تمسك القمر والنجوم.. أنت مش هتعمل حاجة؟ أصل إمام عاشور لعيب جامد فـ.. هتوصل لأعلى حاجة، طب أنت جامد بس مش ملتزم؟ الباب يفوت جمل.. والكورة موقفتش عند النادي الأهلي والأهلي مقفلش بابه”.
وأكمل:” اللي أنا جايلك فيه الكواليس بقى انه إمام أدرك حجم الكارثة اللي عملها مع جمهور النادي الأهلي.. أياً كانت المبررات والأسباب والأمور هو أدرك إنه عمل كارثة كبيرة.. الكارثة دي تابعتها إن جمهور النادي الأهلي في يوم وليلة الموضوع خلصان.. غضب شديد جداً جداً جداً غضب إلى حد إن هو نفسه عمره ما يتصوره”.
و أستطرد فايق:” وبالتالي كان هذا البيان اللي نزله إمام عاشور الساعة 9 و9 ونص واللي فيه بيعتذر لجمهور النادي الأهلي قدام حضراتكم أهو على الشاشة، أنا بقولك كواليسي أنا بقى فريق عملنا إن إمام مغلط نفسه.. مغلط نفسه جداً وعارف إنه أخطأ في حق نفسه قبل الأهلي وقبل الكل وعنده رغبة كبيرة جداً جداً في العودة والعودة سريعاً”.
وأشار: “وأنا بقولك هنا معلومة إنه إمام كان عنده رغبة إن النهارده يكون موجود في التدريب.. لكنه صحي حس إنه تعبان مع مشاكل لها علاقة بالقيء وأمور شبه كدة فالراجل قالك مش هقدر أجي فكلم الكابتن وليد صلاح الدين، وهو متقبل جداً جداً فكرة العقوبة بالمناسبة العقوبة المادية هو متقبلها جداً جداً ولكنه كمان مع تقبله للمليون ونص العقوبة هو عنده رغبة في إنه ينزل ويموت نفسه في التدريب خلال هذا الأسبوع على الأقل عشان يبقى عنده فرصة لو إن هناك لو إن هناك فرصة في تخفيض مسألة العقوبة الوقتية فبدل ما من أسبوعين تبقى أسبوع”.
وأكد فايق:” عايز يعمل أي حاجة يكسر بيها الأسبوعين لأن الأهلي عنده ماتشات كتير جداً وبالتالي هو هيحاول إن هو يبذل مجهود كبير لكي يقنع صاحب القرار أياً ما يكون بقى صاحب القرار”.
وأتم:” إمام معندوش عروض لحد اللحظة دي مفيش حاجة رسمية جت النادي الأهلي لا من أمريكا ولا من السعودية.. اللاعب مقدموش غير إيه؟ مقدموش غير إنه ينضبط ويلتزم مع فريقه.. الالتزام هو اللي هيوصله للي هو عايزه.. عايز يمشي بقى يحترف يمشي.. عايز يعمل كذا.. عايز يعمل أي حاجة من الأمور اللي شبه كدة”.
