“اتمنى اكون جزء لحل الازمة المالية “.. بكلمات مؤثرة ناصر ماهر يودع جماهير الزمالك بعد إنتقاله لبيراميدز ويشكر هؤلاء- صورة

أعلن النجم ناصر ماهر عن تفاصيل رحيله عن نادي الزمالك وانتقاله رسمياً إلى صفوف نادي بيراميدز، موجهاً رسالة واضحة لجماهير القلعة البيضاء.

وأعلن نادي بيراميدز، اليوم، تعاقده رسميًا مع صانع الألعاب ناصر ماهر، قادمًا من صفوف نادي الزمالك، وذلك خلال فترة الانتقالات الشتوية الجارية، في إطار تدعيم صفوف الفريق استعدادًا للبطولات المحلية والقارية المقبلة.

ونشر ماهر صور له مع الزمالك عبر حسابه الشخصي على موقع التواصل الإجتماعي إنستجرام وعلق قائلا: “مش عارف أبدأ منين، لأن في حاجات مش سهلة تتقال، خصوصاً لما تكون بتتكلم لجمهور عظيم زي جماهير الزمالك داخل القارة وخارجها. اسمحوا لي أعبر عن حبي واحترامي ليكم… والله مش مجرد كلام”.

وتابع:” من أول يوم دخلت فيه النادي وأنا حاسس إن المكان ده فيه حاجة تتحب. يمكن عشان ده كيان كبير، أو عشان لاعبين كبار وشخصيات محترمة بتتحمل أكتر من أي حد، أو عشان الجمهور المختلف بأجواءه ودعمه ومتعته… بس في الآخر الكورة ممكن تخليك تسيب مكان انت بتحبه وده جزء من اللعبة، أنا بحبكم جداً والله”.

وشدد ماهر: “النهارده آخر يوم ليا في نادي الزمالك، النادي اللي تشرفت إني ألبس التيشيرت التاريخي بتاعه، ودافعت عنه بكل إخلاص وحب. إنتوا خلتوني نجم بجد، ودايماً بقول إن ربنا أكرمني بجمهور الزمالك”.

واشار:” يمكن الرحلة خلصت دلوقتي بسبب ظروف النادي الصعبة، وأتمنى أكون جزء ولو بسيط في حل الأزمة المالية، وأقدر أساعد النادي، لأن الزمالك كبير ويستحق إن الواحد يضحي عشانه. وبالنسبة لي، الرحلة لسه فيها فصل تاني… إمتى؟ الله أعلم.
بشكر كل زملائي اللاعبين الرجالة بجد في كل المواقف، وبشكر إدارة نادي الزمالك برئاسة الكابتن حسين لبيب، وبشكر جميع المدربين اللي تدربت معاهم”.

وأختتم: “شكراً ك. چون إدوارد، شكراً ك. عبد الناصر محمد، شكراً ك. أحمد سليمان اللي خلاني أكون متواجد داخل نادي الزمالك. وكمان بشكر الأوفياء… جمهور الزمالك العظيم، الداعم الأول للنادي.
آخر حاجة هقولها: أنا دخلت النادي وقلت “أنا بحب الزمالك”، ودلوقتي وأنا ماشي بقول: هفضل أحب الزمالك.””.