وجه وائل جمعة نجم الأهلي السابق، انتقاد حاذ لحسام حسن المدير الفني لمنتخب مصر،بعد تصريحاته الأخيرة عقب الخسارة من السنغال والهجوم ضد المغرب.
وقال جمعة، خلال تصريحات تليفزيونية عبر قناة “بي إن سبورتس”:” اللي حصل من بعد هزيمة السنغال والتصريحات وكل اللي حصل حاجة تكسف، حاجة تكسف الشكل اللي إحنا ردينا بيه على الخسارة وعلى المواقف اللي حصلت طبعاً حاجة مؤسفة جداً”.
وأضاف:” أنا في لوم كبير جداً على الجهاز الفني وعلى المسؤولين على المنتخب، ولوم أكبر موجود على الجانب المغربي اللي كان بينظم الأمور”.
وشدد جمعة:” إحنا مش مشكلة إننا نخسر، عادي إننا نخسر .. لكن كابتن حسام طول البطولة بيشاور على النجوم السبعة، إحنا عندنا سبع نجوم والشمس مبتتغطاش بغربال”.
وواصل:” إحنا أحسن منتخب في أفريقيا، أكتر منتخب عنده بطولات في أفريقيا، أكبر بلد عندها حضارة وثقافة”.
وأشار جمعة:” إحنا علمنا ناس كتير قوي في أفريقيا وما زلنا بنعمل كدة، وما زلنا إحنا الشمس المضيئة في أفريقيا. فما ينفعش كل شوية أطلع أقول للناس كدة، أنا كدة بقلل من نفسي ومن قيمتي كبلد، بخلي الناس تتشكك في اللي بقوله”.
وزاد:” أنا هتكلم على السلوكيات اللي حصلت؛ من بداية البطولة الناس بتساندني في المغرب، والمغرب طول عمرها بلد بتحب مصر وبترحب بينا. أنا لعبت في المغرب كتير ومن أكتر البلاد اللي لعبت فيها شعب مغربي محترم”.
واردف جمعة:” أنا استدعيت الشعب المغربي؟ أنا استعديته! ودي نقطة سوداء في المنتخب اللي حصل ده، إنت داخل في المباريات الإقصائية وإنت بطل ومتوقع إنك توصل، طبيعي الناس مش هتفضل تساندك، فلازم تبقى كنت مستعد لده”
واستطرد: “ومش معنى إن الناس ما وقفتش معاك إن الناس ضدك، لا عادي ده وضع تنافسي وفي الكورة عادي، إنما تيجي لغاية مباراة السنغال وتخسر وتطلع تقول الكلام اللي قلته ده كله؟ كلام طبعاً ما يرضيش أي حد أبداً يا أحمد، والكلام ده لو البطولة دي بتتنظم في مصر واتقال علينا اتفرج إحنا كنا هنقول إيه!”.
وأستأنف جمعة:” الجانب المغربي بقى.. إنت كصحفي جاي تهاجم المدير الفني لمنتخب مصر؟ إنت جاي تستفزه وعايزه يغلط وعايزه يعتذر؟ مالهاش أي معنى أبداً وما كنتش أتمنى إنها تحصل. فالإعلام اصطاد النقطة دي من الكابتن حسام واستفزه وحب يشتغل عليها. دي نقطة سوداء وأتمنى إنها تزول”.
أختتم:” إحنا لغاية دلوقتي بنعاني من اللي حصل في 2009 و2010 (أزمة الجزائر) والصراع اللي الناس حولته لصراع بين شعبين. أتمنى إن بعد النهاردة ما يحصلش أي حاجة سيئة تزود العلاقة اللي حصلت بين الجمهور المصري والمغربي. وشوف رد فعل الناس مع المراسلين بتوعنا، بيتمنوا فوز المنتخب النيجيري!”.
