توجه الإعلامي محمد عبدالجليل “جاليليو”،بطلب عاجل لـ جون إدوارد، المدير الرياضي بنادي الزمالك، بعد بيان المغربي صلاح مصدق لاعب الفريق السابق الذي فسخ عقده مؤخرا.
و أضاف عبد الجليل، خلال تصريحات تليفزيونية عبر برنامج” زملكاوي”، على قناة “الزمالك”:” النهاردة صلاح مصدق طلع بيان بيتكلم فيه بشكل محترم الحقيقة، قائلًا: ‘أنا فترتي أدّيتها على قد ما أقدر، كنت مبسوط إني متواجد مع الفريق، استحملت كتير موضوع المستحقات لكن جت لحظة الانفجار، كتر خيركم وشكراً’. ومن المفترض من لهجة البيان بتاعه إن صلاح مصدق مش ناوي يصعّد لو فيه تواصل معاه”.
وأكمل: “لذلك أنا عندي طلب بسيط من السيد جون إدوارد (المدير الرياضي) وكل من يتولى هذا الملف؛ برجاء إنه مايبقاش ‘موت وخراب ديار’، ده طلب الجمهور مش أكتر ولا أقل”.
وواصل عبد الجليل:” يعني لو أنت خسرت القيمة الفنية للاعب كنت ممكن على الأقل تسوّقه، وبدل ما بتديله مرتبه وأنت بالنسبة لك مش أساسي، تستفيد من بيعه ولو بأموال قليلة، فاللاعب ده أنت خسرته للأبد”.
وشدد: “على الأقل يتم التفاوض باحترام معاه إنه ياخد جزء أو مستحقاته المتبقية (مستحقات هذا الموسم مثلاً)، وما ياخدش عقده بالكامل، لأن الموضوع لو وصل إنه ياخد عقده بالكامل فده ‘الموت وخراب الديار’. فيا ريت يكون التواصل ده في أسرع وقت ممكن لأن الواضح من لهجة الراجل إنه معندوش نية للتصعيد”.
وقال عبد الجليل:” وإحنا بنطالبه في الشأن ده إن الزمالك هو النادي اللي أدّاك اسم في وقت من الأوقات يا مصدق، فمن المفترض لو فيه تواصل ودي يكون في إطار إن الولد ياخد جزء أو يتم جدولة مستحقاته وياخد اللي ليها علاقة بالموسم ده بس، والمسألة ماتوسعش عن كده”.
وانهى: “لأن الحقيقة اللي حصل في موضوع صلاح مصدق، واللي حصل في موضوع عبد الحميد معالي، خبطتين في الراس تقتل مش توجع، وتجلط الجمهور وكل اللي له علاقة بشؤون وأحوال الزمالك”.
