أكد محمود حسن تريزيجيه، نجم منتخب مصر، أن مباراة دور الـ16 أمام بنين ستكون مواجهة صعبة وقوية، مشيرًا إلى أن الجهاز الفني بقيادة حسام حسن حاطط خطة واضحة، وأن جميع اللاعبين جاهزين لبذل أقصى جهدهم لإسعاد الجماهير وتحقيق الفوز، مع التركيز على استغلال الفرص وتحقيق الهدف الأساسي للمنتخب في البطولة.
وقال محمود حسن تريزيجيه في المؤتمر الصحفي: «ماتش بنين مش سهل خالص، ومواجهة قوية جدًا، ومن أول ما خلصنا ماتش أنجولا وإحنا بنحضّر للماتش ده، الجهاز الفني شغال معانا كويس جدًا، والكابتن حسام حسن حاطط الخطة، وإحنا كلنا جاهزين إننا نفرح الشعب المصري، لأن الماتش ده بالنسبة لنا بطولة لوحده».
وأضاف: «الجهاز الفني بيبذل مجهود كبير معانا في التدريبات، علشان نوصل لمرمى المنافس ونخلق فرص كتير، وده فعلًا حصل وبقينا بنوصل كتير، وده مكنش موجود من فترة طويلة، بس لازم نترجم الفرص دي لأهداف، وإن شاء الله في اللي جاي مش هيبقى فيه إهدار فرص زي الأول».
وتابع: «حاجة إيجابية إن منتخب مصر بقى يوصل لمرمى الخصم كتير حتى لو ضيع فرص، ده تطور كبير، وإن شاء الله نشتغل على النقطة دي في ماتش بكرة ونفرح الجماهير».
واستكمل: «كل اللعيبة في المنتخب واحد، مفيش حد أحسن من حد، كلنا هدفنا واحد وبنلعب باسم بلدنا وعايزين نرفع علم مصر، مش مهم مين يسجل ومين يصنع، المهم في الآخر إننا نكسب ونسعد الشعب المصري».
واختتم تصريحاته قائلًا: «إحنا داخلين البطولة علشان نحقق هدف واضح، وعندنا ثقة في نفسنا وفي بعض، وإن شاء الله نكمل المشوار ونحقق اللي كل الناس مستنياه مننا».
