علق الإعلامي سيف زاهر، على تصريح محمد صلاح، نجم ليفربول ومنتخب مصر، بشأن لاعبي الفراعنة، بعد التأهل لربع نهائي إفريقيا.
وقال زاهر، خلال تصريحات تليفزيونية عبر قناة “أون سبورت”:” يوم سعيد.. بعزيمة من نار مكملين المشوار، منتخبنا في دور الثمانية رسمياً .. مباراة النهاردة كانت مباراة كبيرة، وده اللي قلته إمبارح للكابتن حسام حسن: “خلي بالك من الفخ”.
وأشار:” بكرة أكيد كوت ديفوار هيلاعب بوركينا، ولكن كل توقعاتنا تروح لكوت ديفوار ولازم نعمل حسابنا على كده. هدف واحد وحلم واحد.. أفريقيا يا وحوش، التامنة بقى علشان تعبنا”!
وأضاف:” ناس كتيرة وأنا جاي الاستوديو قالت لي “هو الأداء عاجبك؟ هتطلع تقول لنا في ضهر المنتخب؟”، أيوه هطلع أفضل أقول لك كده، وكل دور نكسبه هقول لك كده لحد ما نروح للحلم. “زُق وسجل والحساب متأجل”.
وشدد زاهر:” مش هيحصل حاجة لو ما انتقدتش النهاردة؛ أه عايز تقول إن صلاح مش في أفضل حالاته بس هو جايب هدف، أنا شفتها من وجهة نظر تانية، إنه بيقدر يصنع الفارق”.
وتابع: “حسام حسن النهاردة عمل مباراة جيدة في أوقات كثيرة، مباراة ما كناش الأفضل تماماً ولكن في النهاية قدر ينتزع الهدف ويروح لدور الثمانية”.
وواصل زاهر:” واحد يقول لي “مسمعتش تصريح صلاح وهو بيقول إن معانا لعيبة شباب ومحليين وإن البطولة صعب؟”، صلاح “بينيمهم” زي ما متعودين دايماً ننيمهم من المغرب، هو بينيمهم لحد ما يوصل بالسلامة”.
وأتم:” واللي عايز يترجم يترجم هو معلم مدرسة… هو قال إحنا شايلين حلم بلد وبناخد خطوة خطوة، متعملوش حسابكم علينا.. وفي الآخر هو اللي جاي”.
