علق أحمد عيد عبد الملك، لاعب الزمالك السابق، على أحوال الفارس الأبيض وما يمر به من أزمات، مشددا على ان “العشرية السوداء مكنتش كده”.
وقال عبد الملك، خلال تصريحات تليفزيونية عبر قناة” ام بي سي مصر 2″:” الزمالك لحد النهاردة مفيش مدير فني، على الأقل هل تبقى اتفقت أو شبه اتفقت معاه؟ مفيش لحد دلوقتي على الأرض ما فيش حاجة من الكلام ده”.
و أضاف:” فيه مشاكل كبيرة حاصلة، وفي الكواليس طبعاً إحنا أدرى بالحاجات دي أو عارفين الحاجات دي؛ مش عارفين يتفقوا مع مدير فني، اختلافات ما بين مدير رياضي وما بين مجلس إدارة، الحاجات دي كلها واضحة للناس كلها”.
وشدد عبد الملك:” في الأول وفي الآخر الزمالك محتاج ثورة في الفرقة.. في الفرقة عموماً”.
وواصل:” الزمالك لو بتتكلم من السنة اللي فاتت للسنة دي على ملف المحترفين بس، حوالي 10 أو 12 اسم دخلوا، وفيه ناس دخلت وخرجت ومحدش حس بيهم أصلاً، لاعيبة صغيرة زي اللي جم وفسخوا عقودهم ومشوا، وحتى السرد باك صلاح مصدق جه وفسخ عقده ومشي ملعبش مع الزمالك حاجة السنة اللي فاتت”.
و أشار عبد الملك:” الزمالك لحد الآن على الورق هو داخل في كل البطولات اللي بيشارك فيها قريب، يعني في بطولة الدوري مع كم الصرف اللي موجود طبعاً مع بين النادي الأهلي وبيراميدز والاستقرار اللي فيه سيراميكا، الزمالك قريب بينه وبين الأهلي بونت واحد في الدوري، يعني الموضوع مش بعيد، أنا بكلمك على الورق لحد الآن.. وفي الكونفدرالية قريب ومرشح إنه ياخد البطولة عادي جداً برضه، موجود في كأس مصر… أنا بكلمك على البطولات اللي الزمالك داخل فيها”.
وأردف:” لكن الأجواء اللي حاصلة واللي دايرة في الكواليس جوه في نادي الزمالك ميساعدش أي حد يبقى حتى ياخد 10% نجاح”.
وأختتم:” الناس كانت بتقولك العشرية السوداء، لا مكنش فيه الكلام ده خالص وقتها، مكنش فيه حاجة بتحصل من الكلام ده، كان فيه فروقات وقتها طبعاً مادياً في نادي الزمالك بس برضه ما وصلتش للحال ده أبداً أبداً”.
