تعليق قوي من شوبير بشأن وضع الإسماعيلي والاتحاد في جدول الدوري وفكرة إلغاء الهبوط.. “اللي يهبط يهبط”
علق الإعلامي أحمد شوبير ، على وضع ناديي الإسماعيلي والاتحاد السكندري في جدول ترتيب الدوري المصري وتراجع ترتيبهما حتى اصبحا مهددين بالهبوط.
وقال شوبير، خلال تصريحات تليفزيونية عبر برنامج “الناظر”، على قناة” النهار”: “هات لي الجدول عشان أوريك بس شكل الإسماعيلي في الجدول عامل إزاي، مباراته المتبقية صعبة جداً جداً ومفيش مباراة سهلة على فكرة، مفيش مباراة سهلة في الدوري”.
وأكمل:” فالإسماعيلي فاز تلات مرات خد فيهم تسع نقاط وتعادل مرة، وهو أكثر الفرق مع كهرباء الإسماعيلية والاتحاد هزيمة 10 مباريات اللي هما 30 نقطة بالتمام والكمال”.
وأشار شوبير: “فلم يحصل الإسماعيلي سوى 10 نقاط، ولم يحصل الاتحاد اللي خسر 10 مباريات هو الآخر سوى 8 نقاط”.
وتابع:” فالحل من الاتنين: يا إما يلحقوا نفسهم.. طب الإسماعيلي هيلحق نفسه إزاي؟ هو السؤال، لأن أنا قفل باب القيد يوم 8.. هل الإسماعيلي مأمن نفسه بلعيبة؟ يعني كان حد قال لي لا ده هما متفقين مع 10 لعيبة.. مين وإمتى وفين؟ نفسي أعرف عشان حد يقول لي والاتحاد بيعمل كل حاجه “.
و أردف شوبير:” طب وبعدين إيه الحل؟ الحل الأولاني إنهم يلحقوا نفسهم زي ما قولت وده صعب، الحل التاني إنه يحصل تدخل يعني.. أو يتدخل البعض عشان ينقذوا الإسماعيلي والاتحاد فيتم إلغاء الهبوط، فبدل ما نبقى 21 نادي هذا الموسم نبقى السنة الجاية 23 أو 24 أو 27 أو 37.. ماشي عشان إيه؟ تمشي”.
وشدد:” ده مش حل، دي كارثة، وأنا بقول من دلوقتي اهو وأي جماهير تزعل مني تزعل مني، أنا معنديش مشاكل خالص. يعني فكرة إنك تكسر اللوايح والقوانين هي فكرة خاطئة، شاركنا جميعاً فيها الموسم الماضي من أجل عيون النادي الإسماعيلي، أنا بعترف لك على الهواء، لكن فكرة إنك مرة تانية تكسر القواعد واللوائح والقوانين يبقى خلاص كده”.
وواصل: “ما هو إيه الفرق بين الإسماعيلي وسيراميكا، أو بين الاتحاد ومودرن، أو بين المصري وأي فرقة بقى موجودة؟ فاركو.. مفيش فرق، أو بين الأهلي والفرقة دي كلها، أو بين الزمالك والفرقة دي كلها؟ من يهبط يهبط، ينزل ويعيد بناء نفسه من أول وجديد”.
وأختتم:” هتقولي الأندية الشعبية كده يا كابتن بتدمر، طب هعملك إيه؟ هل أنت شايف إنه الحل إنه لما يهبط نادي شعبي ألغي الهبوط ولما يهبط نادي آخر أكمل بالهبوط؟ أمر صعب جداً جداً على المسؤولين هناك إنهم يعيدوا حساباتهم، لأنه اللي بنشوفه في الكورة في العالم دلوقتي هيقول لك لازم عدد الدوري ينزل لحد ما يبقى 18 والنظام يطبق على الجميع”.
