علق أيمن يونس، نجم الزمالك السابق، على أوضاع الفارس الأبيض، وما وصل اليه من بيع لاعب من أجل سداد الديون.
وقال يونس، خلال تصريحات تليفزيونية عبر قناة “أون سبورت ”
‘” كلمة إن الزمالك في الظروف دي كويس إنه طلع بنقطة صعبة عليا قوي.. إحنا اتفرجنا النهاردة على مباراة أقل من المتوقع، أداء بطيء نسبياً، اثنين مدربين عملوا حساب بعض أكثر من اللازم.. 25 دقيقة الفرقتين بيتعرفوا على بعض وبيجسوا النبض”.
وتابع: “الفرص المتاحة لنادي الزمالك؛ بيزيرا أضاع فرصة ما تضيعش، الجزيري ما رضيش يتعب إنه يثبت نفسه في مباراة هو مش موجود فيها.. شيكوبانزا عمل كورة كوميدية، نسي رجله الشمال إنها موجودة في طريق الكورة فخبطت فيها، وده شيء يهز اللاعب إن فرصة زي دي تضيع جوه الـ 6 ياردة”
وشدد يونس: “الفرقتين لم يقنعوا.. قد يكون هناك غياب كبير وتأثر بالغيابات، لكن لازم نعترف إن الزمالك عنده لاعيبة دوليين؛ حسام عبد المجيد النهاردة رائع، عواد المتألق وشخصيته رائعة، محمد شحاتة ومحمد إسماعيل.. إحنا عندنا ركائز ما تقدرش تقول إن فيه حالة انهيار”
وأشار:” توجع قلبي وقلب أي زملكاوي لما تقول اضطريت أبيع لاعب عشان أسدد ديون.. ناصر ماهر من ركائز التركيبة بتاعة نص الملعب، لما تتباع الحاجات دي بتزعلني.. بنرفض إنك تقول أبيع لعيب عشان أحل مشاكلي، دي كلمة خطيرة جداً”.
وواصل يونس:” نادي الزمالك تعرض لعمليات إحلال وتجديد كتيرة قوي وخطيرة، وده بيفقد أي فرقة شخصيتها.. المشكلة مش بس جوه الملعب، التاثير من بره الملعب خطير؛ الانتظام في المستحقات المالية عنصر مهم جداً ما ينفعش اللعيب يبقى مش فارق معاه ويقول مابيدفعوليش”.
