تعليق مُثير من خالد الغندور بعد فوز مصر على كوت ديفوار.. ويُصرح: لدي عتاب على الأهلي!
علّق الإعلامي خالد الغندور على أداء لاعبي منتخب مصر في كأس أمم إفريقيا، بعد التأهل إلى نصف نهائي البطولة على حساب كوت ديفوار، عقب الفوز بثلاثة أهداف مقابل هدفين، مشيدًا بما قدمه اللاعبون من روح وقتال داخل الملعب، ومؤكدًا أن المنتخب ظهر بشكل يليق باسم مصر.
وقال خالد الغندور: “عايز أتكلم عن اللاعيبة اللي لعبت، محمد الشناوي طبعًا حارس كبير وحارس مصر الأول، ليه أخطاؤه وليه مميزاته، لكن ما ننساش دوره في مباريات كتير مهمة زي مباراة جنوب إفريقيا اللي خلتنا نتصدر المجموعة ونبعد عن فرق قوية، فلازم نرفع له القبعة ونقول له شكرًا حتى لو في بعض الأخطاء.”
وتابع: “محمد هاني قدم مباراة كويسة جدًا جدًا، قدام واحد من أفضل الأجنحة اليسار في البطولة، لاعب عنده 19 سنة ولعب مباراة كبيرة، ومحمد هاني يستحق 10 على 10 عن اللي عمله.”
وأضاف: “حسام عبد المجيد من نجوم اللقاء، لاعب بروح حلوة واستفاد من الطريقة التكتيكية اللي لعب بيها حسام حسن، وهو لما بيلعب بثلاثة مدافعين بيبقى قوي جدًا، لكن لما يلعب بثنائي دفاعي بيبقى الموضوع أصعب عليه شوية.”
وأردف: “ياسر إبراهيم لاعب رجولة ويستحق يكون موجود مع منتخب مصر، لاعب بطولات من زمان، لعب كأس أمم كتير، وبطولات إفريقية، وسجل أهداف مهمة حتى في كأس العالم للأندية.”
واستكمل: “رامي ربيعة قائد بمعنى الكلمة ولاعب مهم جدًا، من وجهة نظري لا يقل عن نجوم الصف الأول، وجاب أهداف مهمة مع المنتخب، وعنده خبرات كبيرة، وكان لازم يتم الحفاظ عليه لأنه لاعب مؤثر جدًا.”
وواصل: “مروان عطية أداؤه ثابت طول الوقت وملتزم بنسبة كبيرة، أقدر أقول عليه 10 من 10، وحمدي فتحي اكتشاف البطولة بسبب التزامه وشغله الكبير في الملعب.”
وأشار: “إمام عاشور كان مفاجأة المباراة، لما يكون حاضر بدنيًا وذهنيًا ما حدش يقدر يقف قدامه، والهدف اللي اتعمل كان مثال على التحرك والتمرير المثالي.”
وأوضح: “عمر مرموش أثبت ذكاءه ومهارته في الهدف اللي سجله، تحرك صح وأنهى الهجمة بقوة وثقة، وده يبين جودة اللاعب.”
وأضاف: “تريزيجيه محتاج يقدّم أكتر من كده شوية، لأنه لسه راجع من إصابة، ومصطفى محمد ما نقدرش نقيمه لأنه شارك دقائق قليلة.”
وأردف: “فتوح لعب قدام واحد من أفضل لاعيبة البطولة، ورغم إننا عايزين منه مستوى أحسن، لكنه اجتهد وما سهلش المهمة على المنافس.”
واختتم خالد الغندور تصريحاته قائلًا: “مبروك للاعيبة ومبروك لمصر، والمرحلة دي محتاجة نقف في ضهر حسام حسن ونوقف الانتقادات، لأنه أثبت إنه مدرب كبير ويعرف يكسب فرق كبيرة.”
