تحدث الإعلامي أحمد شوبير عن كواليس وأداء منتخب مصر في مباراة نيجيريا على المركز الثالث ببطولة كأس الأمم الإفريقية 2025، مستعرضًا الجوانب الفنية، والأخطاء، والإيجابيات، وموقف الجهاز الفني واللاعبين، وذلك خلال برنامجه الإذاعي.
وقال أحمد شوبير: “لعبنا إزاي؟ لعبنا وغيرنا طريقة اللعب لـ 4-2-3-1، لعبنا بمصطفى شوبير في حراسة المرمى، محمد هاني ظهير أيمن قد مباراة طيبة، رامي ربيعة مدافع أدى مباراة طيبة، حمدي فتحي مدافع أدى مباراة طيبة، خالد صبحي ظهير أيسر أدى مباراة طيبة، مهند لاشين في وسط الملعب أدى مباراة طيبة، وبعدين أحمد سيد زيزو، محمد صلاح، إمام عاشور، تريزيجيه، مصطفى”.
وأضاف: “أنا بقولها بوضوح شديد جدًا، الناس اللي قدموا مباراة طيبة هم خط الدفاع، شوبير، وهاني، ورامي، وفتحي، ومهند لاشين، يعني خمسة ستة لاعيبة أكتر من نص الفريق، هجوميًا ما قدمناش مباراة طيبة، هجوميًا ما لعبناش مباراة حلوة، وصلنا وضيعنا، لكن ما قدرناش نخلص الهجمات، ما كناش بنحارب على كل كرة بتوصل لنا حوالين منطقة جزاء المنتخب النيجيري”.
وتابع شوبير: “في واحدة لعمر مرموش يحط الراجل في ضهره بشكل كويس، يحاول يفرد ويجيب جون، وفي الآخر بتضيع مننا الكرة بمنتهى السهولة، وفي واحدة لتريزيجيه لازم تركز وانت بتسدد، وفي واحدة لمحمد صلاح اللي ما كانش في أفضل حالاته امبارح، وعلى فكرة مش عيب خالص نقول إن صلاح ما كانش في أفضل حالاته، بتحصل مع كل اللعيبة، لكن صلاح جايب أكتر الأهداف، جاب أربعة أهداف، وهو تاني هداف البطولة بعد إبراهيم دياز نجم المنتخب المغربي”.
وأوضح: “إحنا دفاعيًا أقوى، والدليل إنك ما تقدرش تقول في نجم من منتخب نيجيريا، لأن رجل المباراة كانت محصورة في الآخر ما بين مصطفى شوبير حارس مرمى مصر ونوابيلي حارس مرمى نيجيريا، وخدها نوابيلي لأنه صد ضربتين ترجيح، وشوبير صد واحدة بس”.
واستكمل: “في النهاية كان في الإمكان أفضل من اللي كان، وسيبك من ضربات الجزاء، دي في الآخر ضربات حظ، نيجيريا نفسها كانت خسرانة من المغرب من تلات أيام، الكرة فيها بخت، بس السؤال لحد إمتى هيفضل لعبتنا المدافعين هم الأفضل؟”.
وأضاف: “أنا فاكر مباراة كوت ديفوار، كلنا كنا طايرين، ليه؟ لأن مرموش قطع من قدام الراجل وعرف يجيب الجون، وصلاح قطع من قدام المدافع ولما جت له عرضية ممتازة من إمام عاشور عرف يجيب الجون، ورامي حارب وداس وسط الناس عشان الكورنر”.
وأردف: “ما ينفعش ألعب ماتشات كاملة وما يجيليش ولا ركنية، وبعدين أمسك قلبي بإيدي مع كل ركنية أو ضربة ثابتة تيجي عليا”.
وأشاد شوبير ببعض اللاعبين قائلاً: “الخماسي مهند لاشين، وهاني، ورامي، وحمدي فتحي، وخالد صبحي، ومصطفى شوبير، كانوا في أفضل حالتهم، وخلوني أخص بالتحية حمدي فتحي وخالد صبحي، الاتنين كانوا هايلين”.
وتابع: “حمدي فتحي ده مش مكانه، لكن أي حاجة يُطلب منه يعملها بيؤديها كويس جدًا، أما خالد صبحي اللي مش بيلعب أساسي في النادي المصري، وهو أصلاً مدافع، عمل مباراة رائعة، وكان عنده جرأة هجومية قدام مهاجم مش قليل”.
واستكمل: “اللحظات الصعبة هي اللي بتطلع اللعيبة الكويسين، إحنا اتعرضنا لظرف صعب جدًا، الظهيرين الشمال، حمدي جاله صليبي، وفتوح جاله شد أو مزق، وربنا يرجعه بالسلامة، ودخلنا في مفترق صعب”.
وأضاف: “مع تغيير طريقة اللعب بقى عندك شكل هجومي أحسن من ماتش السنغال، بس دايمًا يا جماعة احترم المنافس، بس ما تديهوش أكتر من حجمه”.
وضرب شوبير مثالًا قائلاً: “أنا أقابلك في الشارع وأسلم عليك باحترام وراسي مرفوعة، إنما ما أوطيش رقبتي، لأن راسي براسك، نفس الكلام في الكورة، لما تبقى خايف المنافس بيشم ريحة الخوف ويدوس عليك”.
وتحدث عن حسام حسن قائلاً: “حسام قال إنه فخور باللعيبة، وإننا كنا الأقرب للفوز، وتكلم عن الغيابات، وقال إن الإيقافات عرفها بالليل، والتاكتيك كان متبني على مروان عطية”.
وأضاف: “مستغرب من الاتحاد الإفريقي، ليه ما أعلنش بدري؟ وليه رد على بيان السنغال بكل احترام، وما كانش في رد فعل على اللي حصل في المؤتمر الصحفي؟”.
وأكمل: “من مكاسب البطولة إن حسام حسن لعب عدد كبير من اللعيبة، 11 لاعب جديد، ودي ميزة كبيرة، عنده جرأة، وسافر بـ28 لاعب، وده يتحسب له”.
وعن الاحتراف قال: “الناس زعلت من تصريح حسام لما قال عندنا اتنين محترفين وربع، هو ما كانش بيهين مصطفى محمد، هو كان يقصد صلاح ومرموش”.
واختتم شوبير قائلاً: “قرار الإيقاف أربع مباريات وغرامة، ومش هيأثر على وجودهم في كأس العالم، ونتائجنا كانت كويسة، خسرنا ماتش واحد بس”.
وختم برسالة عتاب: “كل العتاب على اللي حصل أثناء السلام الوطني المصري، ونتمنى اعتذار رسمي، لأننا دايمًا بنعتذر لما نغلط”.
