تعليق ناري من شوبير على تكرار غلق ستاد القاهرة وسوء أرضية الملاعب.. ويطالب بهذا الأمر

علق الإعلامي أحمد شوبير، على كثرة غلق ستاد القاهرة للصيانة وذلك بعد الحديث عن إمكانية إستضافة مصر لكأس العالم، وطالب بضرورة لعب المباريات على ستاد العاصمة الإدارية الجديد.

وقال شوبير، خلال تصريحات تليفزيونية عبر برنامج “الناظر”، على قناة” النهار”: ” عمالين نتكلم كل شوية إننا ننظم كأس العالم، وأنا عندي بنية تحتية تعمل ده كله كاستادات، لكن عندي أهم حاجة لا تصلح وهي الأرضيات”.

وأكمل:” النهارده بتفرج على مباراة الزمالك وزد، الحقيقة صعبان عليّ اللعيبة، كل ما لعيب يتزحلق بترعب يجيله رباط صليبي ولا جزع”.

وأشار شوبير: “الأرضيات أمر صعب جداً، وياما نادينا واترجينا المسؤولين بيكلموني يحاولوا يقنعوني إني غلط وهما صح، أقوله يا فندم الأرض وحشة، يقولي أصل يا كابتن لما حصل.. يا فندم والله الأرضية وحشة، غيروا نظام الصرف والزرع.. أول ما يجي شوية مطر الدنيا بتبوظ عندنا”

وشدد:” نروح للصرح الكبير استاد القاهرة الدولي؛ موضوع البذرة الشتوية والصيفية، ودلوقتي داخلين في البذرة الربيعية والخريفية كمان! أي حاجة يقولك هقفل عشان البذرة”.

وأردف شوبير:” أنا بعذر الصديق وليد عبد الوهاب لأنه مموت نفسه، والاستاد تابع لوزارة الشباب والرياضة والوزير هو اللي بيعين الإدارة”.

وواصل:” الأهلي والزمالك وزد والبنك الأهلي ومودرن.. خمس أندية بيلعبوا على استاد القاهرة! والمنتخبات بكافة أنواعها، والفرق الأفريقية بتتمرن عليه. يعني بمعدل كل يوم مباراة على أرضية القاهرة، وده أمر غير مقبول، متقوليش بذرة شتوية وصيفية ويتقفل 40 أو 50 يوم”.

وزاد شوبير:” الأهلي عنده ماتش أفريقيا اللي جاي اتبلغ أنه مش هيعرف يلعب في استاد القاهرة عشان زراعة البذرة، الزمالك النهارده من أسباب سوء عرضه إن الأرضية مش كويسة، والأهلي من أسباب خروجه من كأس مصر إنه مبيلعبش على استاد القاهرة.. لحد إمتى هفضل أدي مبررات وأعذار؟”..

و أستطرد:” وعندي أعظم استاد في المنطقة كلها؛ استاد العاصمة الإدارية اللي حسام حسن بدأ مهمته فيه بماتش نيوزيلندا وكرواتيا، مغلق تماماً مش عارف ليه! سألت سيادة الوزير في 3 لقاءات ولم يتم افتتاحه. أنت عايز تعمر المنطقة دي؟ ادّي فيها ماتشات كورة، الكورة هي مزاج الشعوب”.

وأستأنف شوبير:” استاد العاصمة بيسع 93 ألف متفرج وأرضيته زي الفل وغرف ملابسه زي الفل، أنا عملت حلقة من هناك ورقبتي كانت في السما. هعمل صرح عظيم زي ده عشان أصوره بالقمر الصناعي بس؟ لازم أستخدمه وأستعمله”.

وأختتم: “استاد القاهرة يا باشا شيل الأندية من هناك وهاتلهم ملاعب تانية وما أكثرها في مصر. دي وجهة نظري وللأسف لا تجد آذاناً صاغية ولا إجابات شافية. هل حرام إني أتكلم على مدينة أولمبية كاملة في العاصمة الإدارية؟ هل عيب إني أقول استاد القاهرة بيقفل كل شوية؟ الأمر محتاج نوع من الفهم والوعي”.