علق مقدم البرامج عدلي القيعي، على تمرد إمام عاشور، لاعب الأهلي، ورفضه السفر مع الفريق إلى تنزانيا وتغريمه وايقافه.
وقال القيعي، خلال تصريحات تليفزيونية عبر برنامج “ملك وكتابة” على قناة “الأهلي”:” خبر إيقاف إمام عاشور وتغريمه مليون ونصف جنيه بسبب تخلفه عن رحله الأهلي إلى تنزانيا؟ طبعا ما كنا نتمنى ان نسمعه بالذات دلوقتي، إحنا الحلقة اللي فاتت كنا بنتكلم في إيه؟ مواصفات اللاعب اللي هو قدوة وقيمة واللي بيلعب لاسمه واسم ناديه”.
وتابع:” وقلنا إنه مش اللاعيب الحريف هو اللي بيحدث الفارق بس، ولكن بتواضع وبإدراك للمسؤولية وبإدراك لقيمة المكان اللي بيلعب فيه”.
وشدد القيعي:” أنا لا أعلم حتى الآن السبب وإذا رأى النادي الأهلي أن يعلنه فليعلنه، ولكن النادي الأهلي قال إن هو ما جاش السفر، والأهلي أحياناً بيدفع ثمن إنه ما بيقولناش اللعيبة اللي بتغلط دي عملت إيه، ولكنه نهج في الحفاظ على اللعيب .. أنت بتحافظ على اللعيب أكتر من نفسه وبتحافظ برضه على احترام الفريق”.
وواصل: “كلنا أشدنا بيك ولكن يبدو أن في مصر خطر قوي إنك تسرف في الإطراء .. لما تقول لواحد تسلم إيدك وكأنك بتقول له لخبط لي الدنيا، لما ترضى عن أداء حد وكأنك تحرضه على أن يقصر في حقك .. وهنا بقى الشخصية بتبان، الشخصية التي لا تدرك أن الإطراء كان مقابل جهد”
وأردف القيعي:” وأنا قولت قبل كده الموضوع مش ببوس الفانلة والكلام ده وأنك تتخلى عن فريقك في وقت زي ده لو مفيش اي عذر حقيقي … ده وضع غير مقبول إطلاقا مهما كان حجم النجم، الأهلي اللي وقف 17 لاعب قبل مباراة الزمالك في ربع نهائي كأس مصر ولعب بالناشئين لإرساء المبادئ، هل كان هناك أعظم تأثيراً من كابتن أبو تريكة؟”.
ومن جانبه اشار إبراهيم المنيسي:” في 2012 أبو تريكة رفض أن يلعب مع الأهلي مباراة إنبي في السوبر وتم إيقافه شهرين وتغريمه وقتها نص مليون جنيه “.
وعاد القيعي قائلا:” نص مليون جنيه بالقياس إلى راتبه وقتها كانت تقريباً 20% من عقده لكنلكن زي ما بتطلب تاخد حقك لازم تدي حق النادي .. أنا كنت مستني مين اللي هيقع في هذا الفخ مبكراً.. للاسف جت في إمام عاشور لو مكنش عنده سبب يعني”.
وزاد إبراهيم المنيسي:” ما هو الأهلي مش هيطلع قرار إلا لو كان في سبب “.
ليرد القيعي: لأ ما هو ممكن القرار يطلع لو مش عارفين يوصلوا ليه، أرجوكم إذا كنتوا حريصين على نفسكم أنتوا داخلين على كأس عالم، أنت مش خايف على نفسك يا بني .. وبتغامر ليه برصيد الثقة اللي الناس وثقت فيك؟، نتمنى هذا الأمر ما يتكررش لا من إمام ولا من غيره”.
وأستطرد:” إمام مطلوب منه دلوقتي يتكلم مع الإدارة ويبرر التصرف، ومفيش حاجة تيجي بالضغط يعني لو عايز تغير وضعك في الفريق أو تروح نادي تاني صدقني محدش هيحترمك بالشكل ده، عايز أقول لجمهور النادي الأهلي أوعى تلتفت إلى الشامتين، الشامت ده مجروح هو عايز يشعر إن أنت متضايق حتى لو مش هينبسط هو”.
واستأنف القيعي:” الصفقات مش مكايدة ولا تحفيل، هي انتصارات بجدواها ومن ينجح منها هو اللي يلتزم ويتحمل المسؤولية”.
ليحتتم المنيسي:” على اللاعب المعاقب ينفذ القرار ويستفيد من الخطأ ويرجع لصوابه”.
