علقت الإعلامية لميس الحديدي، على خسارة منتخب مصر بطولة كاس أمم إفريقيا 2025 والمركز الثالث.
وقالت الحديدي، خلال تصريحات تليفزيونية عبر برنامج” الصورة “على قناة “النهار”:” إحنا زعلانين، المصريين كلهم زعلانين.. المشهد كله وحش، بعد ما كان عندنا أمل ورجعت الروح وابتدت الكورة تدينا بعض الفرح، وإحنا بنحب الكورة والكورة مفروض إنها بتحبنا وبنحب نلعب كورة”.
وأضافت:” المنتخب ودع بطولة كأس الأمم منذ قليل في المركز الرابع بعد خسارتنا من نيجيريا بضربات الجزاء”.
وتابعت الحديدي: “المشهد كله وحش، بداية من ماتش السنغال وتصريحات حسام حسن ورد الفعل المبالغ فيه سواء من الصحافة المغربية أو من الجمهور.. مشهد كله دمه تقيل، سخيف يعني”.
وشددت:” ونرجع تاني نقول المشكلة أكبر من مباراة أو اتنين أو بطولة، إحنا عندنا مشكلة كورة مش بنلعبها، فيه مشكلة إدارة ومنظومة رياضية محتاجة تتعالج من البداية من الجذور”…
وأكملت الحديدي: “ده نفس الكلام اللي بنقوله بقالنا كتير جداً في كل بطولة، في كل دوري، بعد كل خسارة إحنا نفس الكلام بنقوله وبنعيده”.
وواصلت:” إحنا في أفريقيا بعيد جداً.. شفنا إحنا فين دلوقتي وبعيد جداً. إحنا بقالنا 15 سنة ما أخدناش كأس الأمم اللي كنا بنقول إحنا عندنا سبع نجوم، إحنا فرقة سبع نجوم.. ده سبع نجوم زمان”.
وزادت الحديدي:” لو إحنا كويسين، لو إحنا بنلعب كورة كويسة، لو عندنا روح رياضية، محناش (Bad Losers) لو كنا حاسين بقوتنا في الملعب مش في أي مكان تاني، ولا حاجة من دي كانت حصلت”.
واستانفت:” كنا حتى لو خسرنا كنا نخسر بشرف، ما هو دي الكورة تكسب مرة وتخسر مرة، لكن على الأقل تكون لعبت، على الأقل تكون رضيت جمهورك، على الأقل تكون أديت أداء جيد.”..
وأختتمت:” ليه إحنا محبطين؟ ليه إحنا مكتئبين؟ يمكن لو كنا خرجنا من البداية زي توقعات كتيرة في الأول كان خلاص تمام.. ده مستوانا وإحنا عارفين إننا مش كويسين من الأول، لكن الحقيقة إن المنتخب السنة دي أدانا أمل والأمل ابتدى يكبر كل مباراة”.
