حسام حسن يُطلق تصريحات نارية قبل مباراة مصر وبنين: “أعمل على تطوير محمد صلاح ومرموش.. وهذا ردي على الشائعات”!

تحدث حسام حسن، المدير الفني لمنتخب مصر، عن طموحات فريقه في مباراة دور الـ16 أمام منتخب بنين، مؤكدًا على احترامه الكامل للمنافس واستعداد اللاعبين لتقديم أداء قوي يليق بتاريخ المنتخب وجماهيره، مشيرًا إلى جاهزية جميع اللاعبين واستعدادهم النفسي والفني لتحقيق الفوز والتأهل إلى دور الثمانية.

وقال حسام حسن في المؤتمر الصحفي: «طبعًا عندنا طموح كبير، وإن شاء الله نعدي دور الـ16، كل الاحترام لمنتخب بنين، اللي أكيد موصلش للدور ده بالصدفة، إحنا متابعينه كويس جدًا، وعارفين إنه في تصفيات أمم إفريقيا وكأس العالم كان ماشي بشكل قوي، لكن في الآخر إحنا منتخب مصر، عندنا 7 بطولات أمم إفريقيا، وورا المنتخب شعب كبير بيحب الكورة وبيحب منتخب بلده، واللاعبين حاسين بالمسؤولية وعايزين يفرحوا الناس».

وأضاف: «إحنا بنمشي بالأسباب، وبنتعامل مع كل ماتش على إنه بطولة لوحده، ذاكرنا منتخب بنين كويس جدًا، نقاط قوته وضعفه، وإن شاء الله بروح اللعيبة وإصرارهم والحالة النفسية الكويسة اللي بينا كلنا، جهاز فني ولاعيبة، هنقدم ماتش كبير ونطلع لدور الـ8، عندي لعيبة رجالة وبثق فيهم كلهم».

وتابع: «محمد صلاح واحد من أحسن لعيبة العالم في آخر 10 سنين، لاعب كبير ومهم جدًا في الكورة العالمية، عنده طموح وشخصية احترافية عالية، وإن شاء الله يحقق أرقام قياسية سواء مع المنتخب أو ليفربول، وهو من الأعمدة الأساسية، وإن شاء الله يساعدنا نحقق البطولة».

وأردف: «أي فريق طبيعي يبقى فيه إصابات، مهند لاشين لسه مدخلش معانا لحد دلوقتي، لكن عندي 28 لاعب كلهم جاهزين، في شوية كدمات عند مهند لاشين وأسامة فيصل ومصطفى محمد، بس مصطفى تمرّن امبارح، وفترة الراحة اللي خدناها فرقت معانا في الاستشفاء والحالة النفسية والفنية، وإن شاء الله نشوف نتيجتها في ماتش بكرة».

واستكمل: «أنا من طبعي سواء وأنا لاعب أو بعد ما بقيت مدرب، عمري ما أستهين بأي خصم، مفيش حاجة اسمها منتخب سهل، وقلت قبل كده إن احتراف اللعيبة الأفارقة في أوروبا فرق جدًا ورفع مستواهم، وبنين منتخب محترم ووصل لملحق تصفيات كأس العالم رغم وجود منتخبات قوية معاه».

وواصل: «ماتش بكرة هيبقى صعب على الفريقين، واللي عايز يكسب بطولة لازم يحترم أي خصم، أنا بالنسبة لي ماتش بنين كأنه نهائي بطولة، وده اللي وصلتُه للاعيبة، إحنا مش شايفين غير بنين دلوقتي وبس».

وأضاف: «أنا دايمًا بحب أختار اللعيبة اللي تقدر تلعب في أكتر من مركز، محمد صلاح عنده إمكانيات كبيرة وبطوره سواء في مركزه أو من خلال بعض المهام له في الملعب، عمر مرموش يقدر يلعب مهاجم ورقم 10 وجناح، كل اللعيبة عندها مرونة، وفيه فكر واحد جوه الملعب، مش لاعب لوحده، وإحنا بنوصل لمرمى المنافس كتير ومش معتمدين على لاعب واحد بس في التسجيل».

وعن شائعة مأدبة محمد صلاح، قال: «إحنا مبنلتفتش للشائعات خالص، والحمد لله بلدنا مكفية ولادها، وفيه إدارة في اتحاد الكورة موفرة كل حاجة للاعيبة، وكل لاعب في المنتخب مهما كان اسمه هو واحد من الفريق، الشائعات دي متعودين عليها، ومفيش أي حاجة بتطلع من المعسكر، كل حاجة بتطلع في المؤتمر الصحفي بس، وتركيزنا كله إننا نفرح الشعب المصري».

واختتم تصريحاته قائلًا: «أنا دايمًا بحط نفسي تحت ضغط، بس ضغط إيجابي، عارف قيمة المنتخب عند الناس، وهدفي الوحيد إني أفرح الشعب، أركز في شغلي، أذاكر المنافس كويس، ومصلحة مصر هي اللي تهمني وبس».