كشف الإعلامي خالد الغندور، عن كارثة يقوم بها النادي الأهلي في ملف إعارات لاعبيه بتحايله على اللوائح لتجاوز العدد المسموح به لإعارة اللاعبين.
وقال الغندور،خلال تصريحات تليفزيونية عبر برنامج “ستاد المحور”:” كنت امبارح اتكلمنا على موضوع إن النادي الأهلي مطلع إعارات لاعيبة أكثر من 14 لاعب، وكان آخرهم دلوقتي قالك النادي الأهلي بيخلص في هادي رياض مقابل 25 مليون جنيه واثنين لاعيبة إعارة”.
وأضاف:” القصة مش النادي الأهلي فقط يا جماعة، القصة وسائل الإعلام الرياضية المصرية، المواقع.. كلنا عارفين كبرامج رياضية كمواقع إن فيه لائحة”.
وأكمل الغندور: “اللائحة بتقول إن من حق كل نادي إنه يطلع 6 لاعيبة في الموسم، ويستقطب 6 لاعيبة (يعني ياخد إعارة 6 ويطلع 6) .. فالنادي الأهلي من بداية الموسم عمال يطلع لاعيبة والمواقع تكتب: الأهلي طلع إعارة.. الأهلي طلع إعارة.. وبيذكروا ده كل المواقع ومحدش اتكلم في الموضوع ده أبداً، كان فيه خوف أو رعب من الكلام في الموضوع”.
وشدد:” الطبيعي ومنطقي أنت كمحرر رياضي لما تلاقي نفسك بتكتب كل شوية إعارة إعارة.. لازم تعمل تحقيق في الموضوع ده، الأهلي لا يمكن يطلع خبر رسمي إنه مطلع أكثر من 14 لاعب إعارة لأنه بكده بيخالف لوائح اتحاد الكرة ”
وتابع الغندور:” فيجي اتحاد الكورة يقولك: شدد مسؤولو اتحاد الكورة على أن النادي الأهلي لم يخالف لائحة شؤون اللاعبين التي تسمح بإعارة 6 لاعبين فقط، وأن القرار ينطبق على كافة الأندية”.
وواصل:” طب يا عم اتحاد الكرة يا لجنة شؤون اللاعبين، بدل ما نقعد نتكلم كتير افتح تحقيق في الموضوع، إحنا هنا في استاد المحور عايزين نعرف إزاي اللاعيبة دي بتطلع وأنت ما ينفعش تطلع غير 6؟”.
وأشار الغندور:” قالك لا، النادي الأهلي بيعمل حاجة جديدة؛ بيطلع 6 لاعيبة، ويعمل عقد ثلاثي مع أندية ‘أصدقاء’ معاه، عايز اللعيب ده وأنا عايز أطلعه إعارة بس اللائحة مش هينفع عشان تخطيت الـ 6 لاعبين، فبكتب عقد ثلاثي ما بيني وبين اللاعب وبين النادي؛ إن أنا أبيعه وأرجع أشتريه. طيب هل ده قانوني؟ هل نادي بقيمة الأهلي كمؤسسة كبيرة ده ما يعتبرش تحايل على اللائحة؟”
وأردف:* الموضوع ما كانش محدد في اللائحة إلا السنة اللي فاتت بس كان 7 لاعيبة، السنة دي بقوا 6 لاعيبة إعارة، اللي بيحصل النهاردة إن اللائحة بتضرب بعرض الحائط بالتحايل وبعقود ثلاثية. العقود دي ما يقدرش يعملها مع أندية بره (زي رضا سليم)، لكن لو النادي صديق وصاحبي والمصلحة واحدة هنمشيها”
وأختتم: “للأسف ده مش نظام، أنتم عايزين تطوروا الكورة في مصر؟ وقت ما الأندية دي تقولك لازم اللوائح تمشي على الجميع”.
