كشف خالد الغندور عن سبب انزعاج بعض جماهير المغرب من أحمد سيد زيزو، لاعب منتخب مصر، خلال بطولة كأس أمم إفريقيا الحالية بالمغرب، مشيرًا إلى أن الأمر مرتبط ببعض التصريحات وسلوكيات الجماهير في الملاعب.
وقال الغندور في تصريحات عبر برنامجه الإذاعي: “ناس تانية مضايقة من زيزو وتصريحاته برضه، لأن امبارح الملعب كان فاضي عكس المباريات اللي فاتت.. اللجنة المنظمة في أكادير كانت بعد الدقيقة 20 بتدخل الجمهور ببلاش، فتلاقي الشوط الثاني دايمًا مليان.. فاللجنة المنظمة لغت القصة دي”.
وتابع: “فزيزو وكذا حد بدأ يقولك طيب ما إحنا ممكن ندفع ثمن التذاكر للجماهير وتيجي تحضر.. فالجمهور المغربي حساس قالك يعني إيه تدفعلنا؟ اللي عايز ييجي هييجي، القصة مش فلوس.. فدخلنا في حتة وحشة بصراحة”.
وأضاف: “فأنا هنا بوجه رسالة، لأن كل الإعلاميين المصريين في المغرب أشادوا بحسن الاستقبال والترحيب من الشعب المغربي ليهم، لدرجة إن ناس كتيرة بيقولك بنركب ببلاش لما يعرفوا إننا مصريين… الناس بتعزمهم دايمًا وحابين تواجدهم”.
واختتم: “فيا جماعة، كرة القدم مفروض تقرب الشعوب، مينفعش تبقى أي حاجة غير كده.. مش عايزين السوشيال ميديا تعمل توتر بينا. في الآخر حسام حسن وضح وقال إنه بيحترم الجماهير المغربية والكل كده، وبتمنى التوفيق ليهم ونتقابل مع بعض في النهائي”.
