رد عدلي القيعي.وإبراهيم المنيسي مذيعا قناة الأهلي،على تصريحات أحمد شوبير،بشأن صفقات الأحمر.
وقال القيعي خلال تصريحات تليفزيونية عبر برنامج “ملك وكتابة” على قناة “الأهلي”:” النهارده كابتن شوبير تساءل مجموعة من الأسئلة، في الراديو بشأن صفقات الأهلي وقال في لعيبه كتير جت ومشيت واللعيبه الجديدة دي هتقعد قد ايه وقال محدش يزعل واحنا هنرد على الأسئلة دي وهو عارف الإجابات على فكرة، لكن علشان الجمهور يعني.”..
وأضاف:” هو سأل عشان حد يجاوب وإحنا هنجاوب، علشان الجمهور ومحدش يزعل زي ما هو قال، عايز أقوله مفيش زعل، زعل من إيه؟ أنت بتقول تحليل والناس هتفهم”.
وشدد القيعي:” أولاً هو عقد مروان عثمان كام سنة؟ مروان إعارة أو استعارة، بس مش ده الموضوع.. إذا كان السؤال كدة يعني .. أنت بتقول هيمشي إمتى؟ يا يمشي بعد إعارته يا يتم التعاقد معاه لأنه هيكمل”.
وتابع:” السؤال بقى مش هنخش في الأسماء دي كلها، أي لاعيب هيكمل ولا هيقعد؟ اللاعيب هو اللي بيجاوب على السؤال، إيه المطلوب منك؟ وده اللي أنا قلته قبل كدة”.
وواصل القيعي:” هو أنت مطلوب منك إيه؟ أنت مطلوب منك زي الكابتن وائل جمعة قعد كام سنة؟ طب هو كابتن وائل جمعة مش جه مدافعين تانية من نوادي تانية خلال وجوده؟ قعدوا كام سنة؟ لو عملوا زي الكابتن وائل جمعة كانوا كملوا .. كابتن عماد النحاس كمل لحد ما بطل، بركات، أبو تريكة، كل دول كملوا”.
وزاد:” اللاعيب بيكمل لما ينتج بالشكل اللي الجهاز الفني عايزه، مش هقول الجمهور لأن الجمهور ساعات أحكامه بتبقى مبنية على طلبات يمكن الجهاز الفني يظلم لاعيب يكلفه بحاجة تبقى على حساب إن الجمهور يحب لعبه مفيهوش الجماليات.. على الأقل الجهاز الفني يقتنع بيه. زائد إن نتائج الفرق بتساعد اللعيبة تكمل ولا لأ “.
واستأنف القيعي:” يا كابتن شوبير أنت عايز تقولي أنت كل اللعيبة اللي جت مش كويسين! أنت قلت كلهم لاعيبة كويسين وأنا موافقك وتم انتقائهم بعناية.. وفي حاجات ظرفية وكلها بتبقى مدد قصيرة.. لكن أنت نفسك قلتها، طب اللعيبة الكويسة دي لما النادي الأهلي يخش فيه في 8 ماتشات ولا 9 ماتشات 20 هدف يبقى يعاند بقى يقولك عشان اللعيبة تكمل؟”
وأستطرد:” لأ لازم احل المشكلة، ممكن اللعيبة مش عارفة تسد من الناحية النفسية أو ناحية الضغوط أو مهملين في حق نفسهم أو درجة الانسجام والالتزام.. عوامل كثيرة مالهاش دعوة بأن كويس ولا وحش، فالانتقاء مش معنى إن جيت ومشيت إنك أنت الانتقاء كان غلط، في النادي الأهلي معندناش هذا الترف”.
ومن جانبه إبراهيم المنيسي أشار:” كابتن شوبير أول كلمة قالها هنتكلم بصراحة ومحدش يزعل، ومحدش يجب إنه يزعل من المناقشة الموضوعية.. لأنه للموضوعية يا كابتن إن أنا أبص على الصورة كاملة. فكرة هدر لعيبة في الصفقات دي سلبية محدش يقدر يقول لك على الغلط صح، حتى وإن كان هذا الخطأ في أندية أخرى الصورة أكبر وأفدح وأخطر”.
وأستطرد:” تقدر تفتح الصورة بالكامل فتلاقي نجوم قدامى في الزمالك بيشتكوا ومنهم حازم إمام، أنت جبت 10 صفقات وبتمشيهم دلوقتي ومعملوش حاجة، 10 كاملين، فنناقش منطق الصفقات.. المنطق بيقول إن أنا لو كل صفقة نجحت يبقى مش هعمل صفقات كل سنة إلا في المحدود”.
وأكد المنيسي:” كابتن شوبير اختار بعض الأسماء وقال لك أولاً مش من باب التفاؤل الكلام على إنه يا ترى عمرو الجزار هيكمل كام سنة؟ لا تقدر تسأل السؤال هو مروان عطية مكمل كام سنة؟ أشرف بن شرقي مكمل عمل كام سنة؟ أحمد سيد زيزو عقده النادي الأهلي يتمسك بيه لمدة قد إيه؟ أليو ديانج بقاله قد إيه؟ وهكذا”.
وواصل:” ده موجود في كل فرق العالم ومنطق لا يدافع عنه لأنه ده جزء من الهدر يخليك تدقق أكتر في الشراء، بس أنت في النهاية مش شاري آلة، مش جايب قطعة غيار ومركبها فضامنها، لا أنت بتتكلم على بشر”.
وأختتم:” كابتن شوبير وأنت حارس مرمى كبير في النادي الأهلي، كام واحد جه ومشي لأنه منجحوش؟ وفي ناس كملت ونجحت، فانت بتحاول تشوف إيه الأنسب دلوقتي في السوق وإيه الأفضل اللي يسد المكان وبتوفر له أفضل نظام عندك، في اللي بيستغله وفي اللي بيركز وفي اللي بينجح وفي اللي بيفشل بسببه أو بسبب ظروفه أو رؤية مدرب.. أسباب كتير أوي”.
