وجه أحمد عيد عبدالملك، نجم الزمالك السابق، رسالة قوية بشأن الفارس الأبيض، وناشد مجلس الإدارة وأشرف صبحي وزير الشباب والرياضة.
وقال عبد الملك،خلال تصريحات تليفزيونية عبر برنامج “زملكاوي”، على قناة” الزمالك”:” أنا من الناس اللي عمري ما برمي الفوطة خصوصاً مع نادٍ عريق بحجم نادي الزمالك، هو قايم أصلاً على فكرة إن وراه جمهور كبير جداً “سبورت” ليه”.
وأشار:” إحنا حتى بطولاتنا كلها بتلاقيها طالعة من “المعاناة”، لو عديت بطولات أفريقيا اللي بتاخدها ولا الدوري، حاجات تتبروز والناس عايشاها لحد دلوقت”
وشدد عبد الملك:” لو فيه استقرار كبير لنادي الزمالك كان يقدر يروح لضعف الرقم ده على الأقل في البطولات أو أكتر كمان”.
وتدخل محمد عبدالجليل قائلا:” مش عايز اكون بدبسك بس لو عندك رسالة واحدة توجهها لشخص واحد بخصوص الزمالك تقول إيه ولمين؟”
ليرد أحمد عيد:” أنا أقولها لكل زملكاوي مسؤول، ولكل واحد عايز نادي الزمالك يبقى موجود على الساحة الرياضية”
وواصل: “الزمالك عمره ما هيختفي عشان عنده إرث كبير وتاريخ وجمهور وكل المقومات اللي تخليه عايش، وجهة نظري إن لازم يبقى فيه تكاتف كبير جداً، ولازم المسؤولين عن الرياضة في مصر يبقى عندهم اهتمام أكبر من كده بنادي الزمالك”.
وتابع عبد الملك:” الزمالك عنده مشاكل كبيرة جداً داخلية سواء في الحتة المادية، ومش هقول لك الأرض بس، ما قبل أرض أكتوبر الزمالك عنده مشاكل مادية كبيرة ما بيخشش لك دخل كبير”.
وزاد:” فبتمنى من المسؤولين، بناشد مثلاً الدكتور أشرف صبحي، بناشد مجلس إدارة نادي الزمالك، بناشد أي حد محب للنادي يتكاتفوا ويشوفوا الحلول الأصلح، مشاكل الزمالك وجهة نظري هي إدارية مادية، ولو مادية يبقى الإدارية هتتحل بشكل كبير.. الفلوس ثم الفلوس، وتوجيه موارد الصرف”.
وعاد الإعلامي محمد عبدالجليل وسأله: “هو أنت حاسس إن الزمالك “متروك لمصيره”؟”.
ويجيب عبد الملك:” أه، ما هو مفيش حد بيزق، بالبلدي كده “زُق معايا الدنيا، وقفنا على رجلينا تاني”.
وأختتم:” الناس كانت بتتكلم إن فيه أندية هي “القوة الناعمة”، نادي الزمالك فعلاً قوة ناعمة كبيرة في مصر والوطن العربي وأفريقيا وله تاريخ، فالناس لازم تبقى واقفة معاه وتبقى “سبورت”، ما يبقوش سايبين الأمور كده ماشية ومحدش عارف حاجة”.
