وجه الإعلامي أحمد شوبير، رسالة نارية للجماهير المغربية بعد صافرات الاستهجان اثناء النشيد الوطني المصري خلال مباراة نيجيريا في بطولة كأس الأمم الإفريقية.
وقال شوبير، خلال تصريحات تليفزيونية عبر برنامج “الناظر”، على قناة” النهار”:” أنا قولت امبارح لجماهير المغرب الشقيقة اللي عمري ما ههاجمهم إنكم احرار ومش عايزين حد يشجعنا عادي”.
وتابع: “النهارده اتفاجئت أن الملعب كله مليان بجماهير بتشجع نيجيريا ليك مطلق الحرية عادي”.
و أضاف شوبير:” لكن هل يليق إنه السلام الوطني المصري اللي هو بيوازي السلام الوطني المغربي أو يوازي اي سلام وطني عربي .. يعزف وسط صافرات استهجان من الجماهير “.
وشدد:” أنا قولتلك ليك مطلق الحرية تشجع اي منتخب قولتلك عايز تهاجم حسام حسن براحتك متكلمتش معاك في ده، لكن السلام الوطني هنا خط أحمر لأي دولة .. مابالك دولة عربيه بتغني النشيد الوطني يحصل فيها كده”.
وواصل: “التحول الرهيب من الموقف المغربي في البطولة صعب .. من تشجيع جنوني إلى تشجيع ضد بشكل رهيب مهما كانت التصريحات أو الأسباب خصوصا إننا كلنا طلعنا وضحنا والاتحاد المصري صرح ووضح وأصدر بيان بيشيد بالتنظيم”.
وزاد شوبير:” احنا هنا لم نتحدث على التحكيم ولا مرة مطلعناش بيان زي الاتحاد السنغالي، في الآخر مفيش اي شئ رسمي صدر من الجانب المصري علشان يحصل كل ده ولو في تصريح هنا او هنا لا يستحق رد الفعل ده كله”.
وأختتم:” احنا كمصريين ساندنا بما يكفي.. والعتاب مستمر، فإنا أتمنى الفترة الجايه تبقى الدنيا أفضل.. ومحدش يزعل مننا برضوا لان الفترة الجايه هيبقى في بطولات هنا اكيد ولو حصل نفس الموقف من الجماهير المصرية محدش هيقدر يقولها حاجه”.
