زيزو كلمة السر.. إبراهيم عبد الجواد يكشف الكواليس الكاملة لسبب تمرد إمام عاشور في الأهلي
كشف الإعلامي إبراهيم عبدالجواد، الكواليس الكاملة بشأن تمرد إمام عاشور لاعب الأهلي، ورفضه السفر مع بعثة الفريق لتنزانيا لخوض مباراة يانج أفريكانز في دوري أبطال إفريقيا.
وقال عبد الجواد،خلال تصريحات تليفزيونية عبر برنامج “ملعب أون”، على قناة” أون سبورت”:” مفيش أي كلام من صباحية ربنا غير على إمام عاشور، وغرامه المليون ونصف جنيه وإيقافه بسبب بعدم سفره مع الأهلي إلى تنزانيا .. بعد ما سألنا على الأمر من أطرافه”.
واضاف:” القصه إن كان في فيديو وقت ركلة جزاء للأهلي في مباراة وادي دجلة، وكان زيزو واقف عايز تريزيجيه يشوطها علشان يبقى الهداف”
وتابع عبد الجواد:” إمام كان عايز يسجل، خاصة إنه لسه راجع وماشي كويس، وأخد الكرة يشوط، وكان عنده نوع غيرة وضيق وزعل من زيزو، وقال: ليه بتعزم على تريزيجيه؟ ما تدهالي أنا… ودي رواية حصلت بجد”.
وشدد:” جه واحد من الكباتن في الأهلي وهو محمد هاني، راح لإمام عاشور وقاله: سيب الترتيب يمشي زي ما هو، وكان في مناقشات، وتوروب قال النظام يمشي وزيزو يشوط”
وواصل عبد الجواد:” الموضوع منتهاش هنا مع إمام عاشور، واستفز محمد هاني وقاله كلام مينفعش يتقال، وهاني اتعصب عليه وقاله مينفعش، المهم اللي زود الطين بلة إن إمام اتغير في الدقيقة 60، هو معملش حاجة وهو خارج، لكن دخل أوضة اللبس قدام اللعيبة كلها، وطلب من وليد صلاح الدين إن يبقى في عقوبة على محمد هاني لأنه تجاوز في حقه، ومكنش في خروج عن النص”.
وزاد:” الموضوع موقفش هنا، وحاول إمام يتواصل مع كابتن وليد، ومكنش في استجابة، ووصل شعور لوليد إن في تلكيكة من إمام هتحصل”.
وأكد عبد الجواد:” المعلومة من مصادر إن إمام إنه كان مقرر مش هيسافر مع الأهلي، الكل كان موجود في المطار، وابتدوا ياخدوا بالهم إن إمام مش موجود، واستنوا ساعة علشان يحاولوا يوصلوا له، وكل تليفوناته مقفولة”.
وأختتم: “ركبوا الطيارة والتليفونات اتقفلت، الموضوع وصل للخطيب، واتاخد قرار مع عبد الحفيظ بتغريم إمام، وتم إرجاء الإعلان لحد وصول البعثة لتنزانيا، وتواصلوا مع وليد واتأكد من الرواية، وتم توقيع عقوبة على إمام، وحتى اللحظة محدش عارف يوصل لإمام”.
