كشف معتز البطاوي المشرف العام على الكرة في نادي سيراميكا كليوباترا، سر التعاون المستمر بينهم وبين الأهلي، وتفاصيل صفقة مروان عثمان للأحمر.
وقال البطاوي خلال تصريحات تليفزيونية ببرنامج “الكورة مع فايق”، عبر قناة” ام بي سي مصر 2″، ردا على سؤال كنت بسألك على الصفقة نفسها تمت إزاي؟ مروان عثمان انضم للأهلي.. عمر كمال عبد الواحد كان داخل في الصفقة ولا لا؟ محمد عبد الله داخل في الصفقة ولا لا؟ ولا كل حاجة منفصلة؟”كويس جداً إنك فتحت الموضوع ده يا هيما، حجم التعاون ما بين النادي الأهلي ونادي سيراميكا كليوباترا من يوم ما طلعنا في الدوري الممتاز وإحنا بنتعاون مع جميع الأندية وخصوصاً النادي الأهلي”.
وتابع: “أنا قبل كده تعاونت تعاون كبير جداً مع نادي بيراميدز وهو المنافس حالياً في الميركاتو للأهلي” .
وشدد البطاوي: “إحنا في 5 لاعبين من سيراميكا راحوا للأهلي، لكن فيه أكتر من 10-12 لاعب من النادي الأهلي في سيراميكا.. إحنا واخدين حوالي 14 لعيب من الأهلي منهم صالح جمعة وعمرو السولية لما خرجوا من النادي الاهلي قدرنا نستفيد منهم”.
وأكمل:” فيه ناس بتقول إني بضحي بالمهاجم الأساسي بتاعي عشان أديه للمنافس.. هداف الفريق عندي دلوقتي هو صديق جولا (7 أهداف) ويجي بعده فخري لاكاي ثم مروان عثمان.. إحنا كان عندنا نواقص في بعض المراكز قدرنا نستفيد بخروج مروان عثمان ونجيب عمر كمال عبد الواحد ومحمد عبد الله وأحمد عابدين وفيرود جايبينه من زامبيا”.
ووجه إبراهيم فايق سؤال له:” محمد عبد الله وعمر كمال وأحمد عابدين جم في نفس الصفقة بتاعة مروان؟ ولا دول بشكل منفصل؟
ليجيب البطاوي: “الحقيقة إن عمر كمال ومحمد عبد الله هما اللي في صفقة مروان عثمان، أما أحمد عابدين فكان صفقة منفصلة.. عمر كمال ومحمد عبد الله جم على سبيل الإعارة”.
و اختتم:” مروان عثمان فيه بند أحقية شراء للنادي الأهلي ولا إعارة فقط؟:” إعارة فقط لا غير”.
