وجه الإعلامي سيف زاهر، رسالة قوية لمجلس إدارة الزمالك، بعد تعادل الفريق أمام المصري، في بطولة الكونفدرالية مستشهدا بجماهير الفارس الأبيض.
وقال زاهر، خلال تصريحات تليفزيونية ببرنامج “ملعب أون”، عبر قناة ” أون سبورت”‘” انتهت مباراة الزمالك والنادي المصري في الكونفدرالية بنتيجة 0-0، ليس في الإمكان أفضل مما كان”.
وتابع:” الزمالك أعتقد إن هي مباراة مرضية بالنسبة له، الأفضلية للنادي المصري.. المصري هو صاحب الفرص الأكثر هجوماً، ولكن في النهاية نقطة مهمة لنادي الزمالك في مشواره في البطولة، في بطولة الكونفدرالية”.
و أضاف زاهر:” ما زال الزمالك بيبحث عن طريقة، وما زال الزمالك بيبحث على طريقة انسجام للعيبة اللي موجودين في الملعب”.
وشدد زاهر:” ويظل النجم رقم واحد ويظل البطل أكيد أكيد هو جمهور نادي الزمالك، الصورة اللي بشوفها كل يوم دي.. وعايز هنا أوجه رسالة لجمهور أو لإدارة نادي الزمالك لو طبعاً يسمحوا: التاريخ ما بيفرقش ولا بيصنف، المركب يا بتعدي يا بتقع يا بتغرق يا ما بتعديش.. يعني الفريق التاريخ مش هيقول ده كان ضد ده، التاريخ مش هيقول إن المجلس كان منقسم، التاريخ مش هيقول حاجة”.
وواصل:” فعلى مجلس إدارة الزمالك إن كل فرد في مجلس الإدارة يشتغل لنجاح المجلس وليس لهدف آخر، في النهاية كله هيتحاسب وكله هيبقى مسؤول. الجمهور بيعمل اللي عليه، شايفين الجمهور ده كام واحد؟ الجمهور ده بالعشرات، بالمئات، بالألاف، بالملايين.. كله على قلب رجل واحد، اللي مجمع كل الرجالة دي حاجة واحدة بس، نادي تيشيرت لونه أبيض بخطين حمر اسمها تيشيرت نادي الزمالك”.
وأكمل زاهر:” لا عايزين كاميرا ولا يظهروا في كدر ولا بيطلعوا في برامج ولا أي حاجة.. أنا اللي بجيب الصورة وأنا اللي قاعد أتفرج عليهم، شباب زي الورد يفرح.. وبيروحوا يشتروا التيشيرت ويشتروا التذكرة ويصرفوا غدا ومواصلات ومصاريف وشقى، كل ده ليه؟ عشان حاجة واحدة بس كيان بيحبوه اسمه نادي الزمالك”.
وأختتم:” فهنا بخاطب 11 واحد أو 12 واحد لازم نكون على قلب رجل واحد، أما بخاطب ناس بالملايين وبتسمع مش عارفين نقنع 11 واحد إن يا جماعة الظروف صعبة؟ عارفين إنها صعبة.. أزمة؟ عارفين إنها أزمة.. ولكن ما فيش وقت لاختلاف في وجهات النظر، ما فيش وقت دلوقتي لانقسام.. ما فيش وقت في انقسام خلاص يبقى شكراً ويجي حد تاني يتولى القصة وتمشي الأمور”.
