وجه الإعلامي أحمد شوبير، رسالة نارية للإعلاميين وصفحات السوشيال ميديا بعد بيان جون إدوارد المدير الرياضي للزمالك، وقارنه بين تصريحات يانيك فيريرا المدير الفني للفارس الأبيض السابق.
وقال شوبير،خلال تصريحات تليفزيونية عبر برنامج “الناظر” على قناة “النهار”:” أحيانا يبقى في حمله! حمله ليه؟ علشان عملت شغلك!؟ كل اللي انت عملته انك عملت شغلك “.
وأضاف:” إحنا هنا جبنا مدرب الزمالك السابق يانيك فيريرا مداخله في البرنامج.. فالراجل قال ايه وقتها قال: الزمالك طردني ومعجبنيش طريقه الرحيل ومحدش اخطرني وعرفت قرار رحيلي من الإعلام والصحفيين ورسائل الواتس”.
وتابع شوبير:” قالي أنا معرفتش أحلل الأهلي بسبب إنه مدفعشي فلوس شركه التحليل وقال أنا متوفرلتليش الظروف اللي تنجحنا والقريبين مني قالولي اللعيبه مش بتاخد فلوس خالص وعرضت اديهم فلوس من جيبي وإنه هو مجبشي الصفقات واللي وافق عليه كان بيزيرا وانه مكنشي عايز يدرب برا النادي ولا ادخل في القصه دي وقررت التقدم بشكوى بسبب عدم ردهم عليا”.
وشدد: “خلاص يانيك فيريرا مشي سيبك منه بقى .. تعالى على المشرف على ملف كرة القدم في الزمالك جون إدوارد”.
وأكمل شوبير:” نزل بيان طويل عريض في منتصف الليل .. قال فيه ايه: قالك اتوعدنا بمئات الملايين وملقناش حاجه في الاخر وقال أنا بنيت خطة العمل على فلوس اتقالت ليا هتيجي وده محصلشي ومجاش منهم غير مبلغ بسيط وقال إنها سياسه دبر نفسك بنفسك يا سيد”.
وواصل:” قال إزاي هنلعب في الظروف دي ولازم حلول لان الموضوع صعب والاجواء دي”.
و أردف شوبير:” أنا عايز اسأل سؤال ايه الفرق بين تصريحات يانيك فيريرا معايا وبيان جون إدوارد المدير الرياضي والمشرف العام على الكرة ”
وزاد:” الاغرب بعد البيان ده بيومين الزمالك طلع بيان يوجه الشكر لأحمد عبدالرؤوف بعد قرار استقالته وإنه جيه بالتنسيق مع جون إدوارد المشرف العام على الكرة”
وأشار شوبير:” طيب يا جماعه الخير يا اخواتنا الإعلاميين المحترمين.. يا اصدقائنا على السوشيال ميديا اللي قولتوا إننا علشان يانيك فيريرا قال تصريحات معانا اننا عايزين ندمر الزمالك!! هل المشرف على الكرة في الزمالك جون إدوارد عايز يدمر الزمالك بعد بيانه؟”.
وأستأنف:” هل مجلس الزمالك لما يطلع بيان يكتب فيه بالتنسيق مع جون إدوارد يبقى عايز يدمر الزمالك؟، ولا القصه لما واحد يجبلك الحقيقة ويوضحلك وبيدق ليك جرس إنذار من بدري، بدل ما تقول متشكرين.. بتقوله يا مغرض يا حاقد يا جاحد يا اللي بتكره ”
وأختتم:” طيب هل حضرتك تقدر تقول الكلام ده لجون إدوارد ولا متقدرشي؟ مؤكد إنك متقدرشي، رغم اني مدين منهم إنهم يعتذروا عن اللي قالوله.. لكن أنا مسامح لاني اتمنى فعلا الزمالك يرجع احسن من الأول”.
