أعلن الإعلامي أحمد شوبير تفاصيل جديدة بشأن انتقال اللاعب الشاب حمزة عبد الكريم إلى نادي برشلونة الإسباني، مؤكدًا أن الصفقة حُسمت بشكل نهائي، ولم يتبقَّ سوى إجراءات بسيطة لتفعيل التعاقد، في خطوة لاقت ترحيبًا كبيرًا داخل الوسط الرياضي.
وقال شوبير في تصريحات عبر إذاعة «أون سبورت إف إم»: “حمزة عبد الكريم خلاص.. أيوه رسميًا حمزة عبد الكريم في برشلونة الإسباني، خلصت القصة والعقد وصل وتمام التمام، والنهارده أو بكرة.. بس خلاص حمزة موضوعه مع برشلونة انتهى”.
وتابع: “دلوقتي بس النادي الأهلي مستني يعني خلاص بقى تفعيل العقد اللي جه من برشلونة، ومسألة ساعات أو يوم أو يومين، لكنه خلاص حمزة عبد الكريم انتقل على سبيل الإعارة لنادي برشلونة، والكورة بقت في ملعب حمزة نفسه دلوقتي”.
وواصل: “إنت يا باشا، إنت اللي تشد حيلك، وإنت اللي تموت نفسك، وإنت اللي تثبت وجودك، لأن الناس هناك يعني عايزين حمزة، وده شيء يتحسب له قوي قوي، حاجة جميلة”.
واختتم: “أنا بصراحة مبسوط جدًا إن لعيب مصري هيلعب في الدوري الإسباني، مبسوط بشكل كبير، وعلى فكرة هم هناك في إسبانيا شايفين إن ده هيبقى له مستقبل كبير قوي، يتمرن بقى على نظام التغذية ونظام التمرين ونظام المعيشة، وهو ولد مؤدب جدًا ومحترم جدًا، وبالتالي أنا شايف إن عنده فرصة كبيرة للنجاح إن شاء الله”.
