أكد طارق يحيى، نجم الزمالك السابق، على رفضه تولي منصب مدير الكرة بالفارس الأبيض، خلال الفترة المقبله في حال طلب منه ذلك
واثناء تواجد طارق يحيى في ضيافة الإعلامي أحمد شوبير عبر برنامج “الناظر” على قناة “النهار ” سأله الأخير:” ايه المشكله اللي بينك وبين جون إدوارد، لانك مع بدايته كان ليك تصريحات قوية وانا حتى وقتها قولت يا ابناء الزمالك اقفوا خلف التجربه ودعموها .. فأنت ايه كانت وجهه نظرك؟”
ليجيب يحيي: “أنا عمري ما قابلت جون إدوارد ولا في اي حاجه بيني وبينه ولا اعرفه، أنا مهاجمتش جون إدوارد لا شخص ولا وظيفة.. أنا قولت هنا في قناة النهار معنديش مشكله في تعينه لكن عندي مشكله في تجريف النادي من الإداريين وعماله ورموزه وقولت صراحه”.
ليعود أحمد شوبير سائلا:” ايه أكبر الأخطاء اللي عملها جون إدوارد؟”.
ليرد يحيى: “أنا قولت قبل كده لو جون إدوارد مشي .. هتجيب كل الناس دي من فين تاني بعد ما مشيوا، أكثر حاجه يبقى قلقان منها أي لاعب بعد اي مباراة إنه لما يروح النادي ويشوف الجمهور أو الاعضاء هيقولوا ليه ايه، أنت النهارده بتلعبنا برا النادي ليه؟”.
وشدد:” الانتماء يعني لما تخش نادي الزمالك كل يوم هتتطبع بنادي الزمالك.. وتشوف الجمهور كل يوم وتتكلم وتحس بالنبض.. فأنت كده اضعفت النادي، هو اللاعب لما يروح من الشيخ زايد إلى الكليه الحربيه بياخد وقت قد ايه؟”.
ليتدخل شوبير مجددا:” اه وقت طويل وبنزين وفلوس كتيرة بتدفع وشغلانه”.
ليقول يحيى:” بجانب إنك مش معاك فلوس تدفع اصلا للكليه الحربيه.. احنا في أزمة “.
ووجه له شوبير سؤال جديد:” لو طلب منك طارق مصطفى لو تولى منصب المدرب يعني إنك تبقى معاه مدير الكرة هتعمل ايه”.
ويوضح يحيي:” لا مش هوافق.. هشتغل ايه؟ ما هو في مدير رياضي في النادي، المدير الرياضي بيعمل سياسه النادي في كرة القدم .. مدير الكرة هيعمل ايه، إزاي في وجود مدير رياضي تقولي تعالى مدير كرة مينفعش”.
