فتح الإعلامي أحمد شوبير ملف المدير الفني الجديد لنادي الزمالك، متحدثًا عن كواليس النقاش الدائر داخل النادي، وحالة الانقسام بشأن هوية المدرب المقبل، إلى جانب الأزمات المالية التي تلقي بظلالها على قرارات الإدارة، في ظل قلق جماهيري متزايد مع اقتراب حسم ملفات القيد والصفقات.
وقال شوبير في تصريحات عبر برنامجه الإذاعي: “في نادي الزمالك في رأيين، رأي جون إدوارد اللي عايز مدرب أجنبي، ورأي إدارة النادي اللي بتقولك والله إحنا لو هنجيب مدرب أجنبي أقل حاجة هيبقى بخمسين أو ستين ألف دولار، أقل حاجة يعني.”
وتابع: “فيه ناس بتقولك هنعيد تجربة يانيك فيريرا لما استرخصنا وجبنا مدرب وماكانش ناجح، وأنا بقولك اللي بيتقال جوه نادي الزمالك، فإحنا مش هنقدر ندخل في الدوامة دي والدوشة دي بتاعة إني أجيب مدرب أجنبي رخيص مايبقاش على قد مستوى وطموحات نادي الزمالك وجماهيره.”
وأضاف: “ده كلام إدارة النادي، ماشيين بالشكل اللي هو أنا مش هقدر أدخل نفسي في دوامة، ومش هقدر أكلّف نفسي فلوس، وأنا أصلًا عليّ فلوس ومش عارف أفك القيد، خلي بالك جمهور الزمالك النهارده 5 يناير، جمهور الزمالك بقى بيبص لشهر يناير وكل يوم بيعدّي فيه بقلق شديد جدًا، لأنه عارف إن الفرقة محتاجة فلوس، محتاجة صفقات، ومحتاجة فلوس علشان نفك إيقاف القيد، هل هيعرفوا يدبروا فلوس ولا مش هيعرفوا؟”
واختتم شوبير قائلًا: “هو ده السؤال المهم جدًا عند كل جماهير نادي الزمالك، جون إدوارد مش ميّال لفكرة المدرب المصري، وطريقة شغله إنه ما بيحبش يشتغل مع مدرب مصري، ومستنيين عودة كابتن حسين لبيب، هو ومعاه طبعًا جون ومع هشام نصر، مستنيين عودة كابتن حسين لبيب علشان يعرضوا عليه الدنيا شكلها عامل إزاي، لأنه خلاص اتقرر نهائيًا إن مباراة كأس عاصمة مصر كلها هتتلعب بالناشئين.”
