كشف الإعلامي أحمد شوبير، كواليس جديدة بشأن أزمة إمام عاشور، لاعب الأهلي، بعد تمرده وتغريمه ماليا وايقافه إسبوعين.
وقال شوبير، خلال تصريحات عبر بث مباشر على حسابه الرسمي في موقع التواصل الإجتماعي:” مشكلة إمام عاشور بدأت في مباراة وادي دجله بعد ما جت ركلة جزاء، بيس توروب كان كاتب 3 لاعبين يسددوا ركلات الترجيح إمام عاشور وزيزو وتريزيجيه، وطبعا مش شرط علشان هو محدد ثلاثه يبقى ده لازم اللي يشوط اللي يتقال الأول.. لا المدرب يحدد وقتها عادي”.
ونابع:” وقت ركلة الجزاء إمام عاشور مسك الكورة عايز يشوطها ولكن مساعد المدرب قال زيزو اللي يشوط ووجهه نظر الراجل أن زيزو كان بيتعرض لحمله قوية جدا فكان عايز يدعمه ويقف جنبه”.
وأضاف شوبير:” دخلوا اوضة اللبس بعدها فحصلت مشادة بين محمد هاني كابتن الفريق وإمام عاشور وحصل زعيق وحتى الكابتن وليد صلاح الدين انفعل بسبب القصه دي”
وشدد:” ولكن الغريب ان الازمة انتهت عقب نهاية المباراة وضحكوا وهزروا عادي .. فالكل قالك تمام بتكلم على قصه إمام وهاني”.
وزاد شوبير:” بعد المباراة الأهلي خد اجازة وكان شايف اللعيبه مرهقة وقال يريحوا لحد ما يتجمعوا في المطار للسفر .. فمحصلش تجمع في النادي يوم الأربعاء ولا في فندق والمكان كان محدد للتجمع في المطار”.
وواصل:” تاني يوم المباراة حصل اتصال بين إمام عاشور والدكتور أحمد جاب الله واللاعب قاله أنا تعبان والدكتور قاله انت طالع من الماتش كويس تعبان ازاي .. قاله لأ أنا تعبان وقولهم كده في النادي إني مش هقدر اسافر .. قاله لا مش هينفع لازم تيجي المطار ونشوف حالتك لأني مش صاحب قرار إنك متسافرشي.. قاله أنا بلغتك بالموضوع وبلغهم اني تعبان ومش قادر والدكتور رد عليه قاله مش هينفع”.
وأكمل شوبير:” الصبح راحوا علشان السفر استنوا في المطار شويه وامام مجاش .. الكل حاول يتصل على إمام عاشور كل وسائل الاتصال سواء موبايل ولا نت ولا فيس تايم مفيش خالص .. حتى تليفون زوجته، رئيس البعثه محمد الدماطي بدأ يقلق وبلغ الجميع بالأمر إن إمام عاشور مبيردش نهائيا ومش عارفين يوصلوا ليه”.
وزاد:” حصل تواصل مع الشؤون القانونية في النادي وبعد المشاورات ومراجعه اللوائح والعقود قرروا تغريمه مليون ونصف وإيقافه اسبوعين ونزوله تدريب منفرد، أنا قولتلك الأمور هتزداد صعوبة مع إمام عاشور إلا إذا .. وهقولكم ليه”.
واستأنف شوبير:” الأهلي استقر على غرامه مليون ونصف جنيه وتدريبات منفرده ودي مربط الفرس، المعلومة اللي جتلي من صديق من ادم وطني .. دي معلومات بقولكم موثوقه.. المصدر قالي أن آدم وطني بيحلف إنه ملوش اي علاقه بقصه إمام عاشور نهائيا ولا جابله عرض ولا في اي حاجه وطلب مني أوضح الأمر ده”.
وأشار:” كان في استياء من اللعيبه ومن الأهلي للموقف كله، ايه اللي هيزود أزمة إمام عاشور بقى؟ إنه بكره لو مراحشي النادي الأهلي وامتثل للتدريب المنفرد “.
وأستطرد شوبير:” لو إمام عاشور مراحشي بكره التدريب الأزمة هتتصاعد بطريقه غير مسبوقه وممكن يبقى في قرارات بقى من اللي عمالين تقولوها، بقول تاني لو إمام عاشور مراحشي النادي بكره ووضح وامتثل لقرار الإدارة.. ممكن يكتب نهايه مشواره مع الأهلي بشكل رسمي”.
وأختتم:” أنا حاولت اتواصل مع إمام عاشور ولكن معرفتش اوصل ليه خالص، في الاخر الأهلي معندوش غالي ومش هيفرق معاه حاجه وممكن يجمده يعني مفيش كأس عالم .. هتروح كأس العالم إزاي وانت مش بتلعب .. فممكن اللاعب يفقد فرصه اللعب في المونديال”
