كشف الإعلامي أحمد شوبير، خلال تصريحاته الإذاعية، عن كواليس عديدة داخل النادي الأهلي تتعلق بمستقبل عدد من اللاعبين، وعلى رأسهم محمد مجدي أفشة وعمرو الجزار، إلى جانب تطورات ملف الإعارات والصفقات المتبادلة مع أندية الدوري المصري، موضحًا حقيقة الأرقام المتداولة بشأن عقود بعض اللاعبين، ومسلطًا الضوء على تفاصيل مهمة تخص تحركات الأهلي في سوق الانتقالات خلال الفترة الحالية.
وقال شوبير في تصريحات عبر برنامجه الإذاعي صباح اليوم: “زي ما قلنا لكم من كام يوم إعارة أفشه للاتحاد السكندري لمدة ست شهور، وقلت لكم إن أفشه ما عندوش أي مانع إنه يمدد عقده مع النادي الأهلي، وبالفعل قعد مع الكابتن وليد قال له عايزنا نمدد سنة اثنين ثلاثة، فهو مدد تعاقده مع النادي الأهلي لمدة موسم كمان، كل الجماعة اللي إنتوا سمعتوها على 10 مليون جنيه والحاجات دي ده مش مظبوط، الأرقام دي غير صحيحة على الإطلاق، يعني ده ما ليهوش أي أساس من الصحة.”
وأضاف: “على فكرة أفشة امبارح شارك في المران، واللاعيبة ودعته والجهاز ودعه، وهو كتب كلمة كده قال لك أتمنى ألا يكون وداعًا دائمًا، وكتب كلمة عاطفية. قفشة يا جماعة عنده وجهة نظر شخصية، يعني أهم هدف في القرن الحالي للنادي الأهلي هو هدف الفوز في نهائي القرن ما بين الأهلي والزمالك نهائي إفريقيا، ده أهم، أنا بعتقد ده أهم هدف للنادي الأهلي حتى هذه اللحظة، يعني 26 سنة من القرن الجديد ده هدف في القرن بالنسبة للنادي الأهلي حتى هذه اللحظة، واعتقد إنه له مكانة كبيرة في قلوب جماهير النادي الأهلي.”
وتابع شوبير: “زي ما قلت لك من امبارح ومن قبل كده يعني إن عمرو الجزار خلاص بقى لاعب في النادي الأهلي، وامبارح راح النادي الأهلي، بس هقول لك معلومة مهمة، فاكر آخر مباراة بين البنك الأهلي والزمالك اللي الزمالك جاب فيها هدف التعادل؟ دي اتصاب فيها عمرو الجزار، كانت عنده إصابة في العضلة الضامة، وهو بيتماثل للشفاء، عمل التحاليل وعمل الكشف الطبي على مدى يومين كاملين، ثم امبارح ذهب إلى النادي الأهلي، والدكتور قال إنه بعد أسبوع يقدر ينزل التمرين بشكل عادي، وجماهير الأهلي متفائلة بيه ومتخيلينه خليفة لوائل جمعة.”
واستكمل: “على فكرة عمرو الجزار عنده قصة كفاح مع المرض، وربنا كرمه وانتصر عليه والحمد لله ربنا شفاه وعافاه وبقى 100 فل، ومن المواقف الطريفة إنه عمره ما كان أهلاوي ولا حاجة، وكان محدد جوازه يوم 23 الشهر ده، فالنادي الأهلي قال له يا باشا عندنا مباراة في نفس اليوم مع يانج أفريكانز، انسى، قالوا له انسى الدنيا وريح بالك، وكان جاهز يا عيني لكنه خلاص أجل القصة، احتمال يكتب كتابه في حفل عائلي، وهو امبارح اتمرن تمرين تأهيلي في النادي الأهلي.”
وأوضح: “دي حاجتين بالنسبة لقفشة وبالنسبة لعمرو الجزار، نمره تلاتة مروان عثمان، اعتبره في النادي الأهلي، وأنا بقول لك معلومة، اعتبره في النادي الأهلي، بس في حتة صغيرة قلتها لكم امبارح وما حدش خد باله منها، وهي إن الإعارات خلصانة عند سيراميكا، وعنده ست إعارات، فهو بيأمل في عودة أحمد رمضان بيكهام من الإعارة مرة تانية، يبقى بدل ما هو مطلع ستة يطلع خمسة، ويطلع مروان عثمان إلى الأهلي على سبيل الإعارة.”
وأضاف: “أنا بقول لك كلام أنا فاهمه كويس وسائل فيه بشكل كويس، الموضوع خلاص رايح النادي الأهلي، والولد سيستم نفسه على كده، وعلي ماهر سيستم نفسه على كده، طيب مين اللي راح مكانه؟ مبدئيًا راح عمر كمال عبد الواحد، لم لبسه وودع زملاته ومشي على سيراميكا وهو فرحان إنه مع علي ماهر لأنه بيحب علي ماهر جدًا، وعلي ماهر فرحان إن عمر كمال رايح له.”
وتابع شوبير: “محمد عبد الله رايح برده إعارة لنادي سيراميكا، يعني الأهلي عنده اتنين بس إعارة، سيراميكا قالوا للأهلي إحنا هنعاملك في موضوع مروان عثمان زي ما إنت هتعملنا في موضوع عمر كمال ومحمد عبد الله، هتدينا هيطلع مروان عثمان إعارة، أوكي، الاتنين دول إعارة بشرط شراء، إحنا كمان هنشتري، وخاصة محمد عبد الله، لكن الأهلي موافق بالنسبة لعمر كمال، لكن قال لك محمد عبد الله ده مستقبل النادي الأهلي، فمش عايزين نحط حق الشراء.”
واختتم: “الموضوع خلصان مفيش فيه كلام، بالنسبة للأهلي والمصري، الأهلي دخل بقوة في موضوع أحمد عيد، وكان في اجتماع بين كامل أبو علي وقيادات الأهلي، حضر سيد عبد الحفيظ ووليد صلاح الدين، والكابتن الخطيب اتصل، وكانت المفاجأة إن المصري ما طلبش شراء عمر الساعي، والأهلي تراجع عن ضم مخلوف واكتفى بأحمد عيد، والصفقة التبادلية بتنحصر في العشق مقابل عيد، وموضوع محمد سيحة المصري توقف فجأة، وقالوا عايزين أحمد عيد بس، وفي موضوع استيل، نائب رئيس الترجي قال إن الأهلي اتكلم في الأمر، وكان فيه عرض 500 ألف دولار من مولودية وهران، لكن لما جاء عرض من الأهلي والمصري والمغرب الفاسي استنوا شوية، والحوار مع وكيل اللاعب ولسه مستنيين يشوفوا الدنيا هتمشي إزاي.”
