كشف الإعلامي أحمد شوبير عن كواليس جديدة داخل النادي الأهلي، تتعلق بمصير المدافع المغربي أشرف داري، واقتراب انضمام يوسف بالعمري بشكل رسمي إلى صفوف الفريق، موضحًا تفاصيل الاتفاقات التي تمت خلال الساعات الأخيرة، وأسباب التحركات الأخيرة داخل القلعة الحمراء، وذلك في تصريحات إذاعية أثارت اهتمام جماهير الأهلي.
وقال شوبير في تصريحات عبر إذاعة «أون سبورت إف إم»: يوسف بالعمري يوسف بالعمري عشان الأسئلة والكلام الكتير، يوسف بالعمري هيوصل النهارده، نعم هيوصل النهارده يوسف بالعمري، وخلاص هيتم قيده داخل النادي الأهلي، وهقول لكم شوية كده كواليس في موضوع يوسف بالعمري عشان تبقوا عارفين القصة شكلها عاملة إزاي، يعني إزاي يوسف بالعمري يا كابتن والأهلي قائمته الأجنبية كلها مكتملة.
لا، تم الاتفاق بالأمس مع أشرف داري على الرحيل، أشرف داري هيخرج، أشرف داري عفوًا، هيخرج إلى أحد الأندية أو أحد الدوريات الأوروبية، معرفش الدوري إيه بالظبط، يعني عارف ومش هقول لأني مش متأكد منه بنسبة 100%، وأنا ما بحبش أقول خبر إلا لما أكون عندي ثقة فيه، ودائمًا شعري معاكم، يعني حتى لو قلنا خبر ما طلعش صحيح بنسبة 100% لأن الواحد بيبقى بيحاول من هنا ويحاول من هنا، عشان تجيب خبر لازم تكلم مش أقل من 10 مصادر من كل الاتجاهات، فأحيانًا بيطلع الخبر وأحيانًا لا، وده دايمًا بيبقى في أضيق الحدود.
لكن أشرف داري تم الاتفاق بالأمس مع النادي الأهلي على إنه خلاص شكرًا وإنه هيمشي على الأقل الفترة دي، إذا ما كانش هيمشي على طول يعني، هيمشي الفترة دي، والنادي الأهلي هيتحمل جزء من مرتبه، حتى لو كان في أوروبا، أيوه حتى لو كان في أوروبا.
أشرف داري، أنا بقول لك بالضبط التفكير، أشرف داري حاطط عينه على كأس العالم، وبيؤكد للمسؤولين في النادي الأهلي إنه هيكون أساسي مع المنتخب المغربي في كأس العالم في شهر ستة، هو أشرف بيقول لهم كده، يعني هو قال بالضبط في الحوارات اللي حصلت إنه مش مسؤول عن الإصابة، وإنه عمره ما حصل له هذا الكم من الإصابات، وإن كل ما يتردد إن عنده إصابة مزمنة هذا الأمر غير صحيح، لأن الإصابات اللي جت له كلها كانت إصابات متفرقة.
وأرجع أقول لك إن نفسه يستمر، والمدير الفني للنادي الأهلي قال له إنت لعيب هايل، بس مشكلتي معاك هي الإصابات فقط لا غير، لم يشكك أبدًا أبدًا في قدرة اللاعب، ولا اتكلم عنه بشكل إنه ضعيف فنيًا، بالعكس، لكنه هي الإصابات.
فأشرف داري يرحل، ولو على سبيل الإعارة، ويدخل يوسف بالعمري اللي بيصل اليوم إلى القاهرة تمهيدًا لإعلان الانضمام.
طيب إنت قلت عندك حاجة في بالعمري؟ آه، فهو بصوا بوضوح شديد جدًا، يعني هو مش شايف إن أمله في حتة الباك ليفت، يعني شايف إنه كان عايز حد أقوى من كده، حد أفضل من كده، بالطريقة دي عشان تبقى القصة واضحة بالنسبة لحضراتكم.
لكن إدارة النادي تدخلت وقالوا له إن اللاعب ده لاعب كويس ولاعب جيد ولاعب هيفيد النادي، وإحنا شايفين وإحنا باصين، وبالتالي راجع لهم خلاص طالما هو اختياركم وإنتوا مقتنعين، في الملعب، وإذا كان كويس في الملعب يا مليون مرحبًا بيه، يبقى لاعب أساسي في النادي، لكنه محدش هيلعب غير لما تكون أنا شايف إنه بيؤدي بنسبة 100%، ده رقم واحد عشان نخلص من قصة أشرف داري ويوسف بالعمري”.
