سلّط الإعلامي أحمد شوبير الضوء على عدد من الملفات الساخنة داخل النادي الأهلي، أبرزها موقف الإدارة من بعض الصفقات المطروحة، إلى جانب رفض عدد من لاعبي الفريق لفكرة الدخول في صفقات تبادلية، كاشفًا عن تفاصيل مهمة من كواليس المفاوضات ورؤية اللاعبين لمستقبلهم مع النادي.
وقال شوبير في تصريحات عبر برنامجه الإذاعي صباح اليوم الإثنين: “هادي رياض اسمه كان مطروح بقوة في بداية السنة في الأهلي، وعلى فكرة اسمه رجع يتكرر أكتر دلوقتي، وبقى متداول بقوة جوه النادي الأهلي.”
وتابع: “عمرو الجزار اسمه موجود برضه، بس أنا بطلب من الأهلي إنه يحسم الموضوع، يا تاخد قرارك وتقول أنا عايز هادي رياض وتخلص، ما ينفعش تفضل كل شوية تقارن بين هادي رياض وعمرو الجزار، خد قرار وخلص الدنيا، دي وجهة نظري الشخصية، لكن اسم هادي رياض موجود بقوة.”
وأضاف: “في بعض اللاعبين جوه النادي الأهلي مش موافقين على فكرة الصفقات التبادلية، لأن الموضوع دايمًا بيترمي كده كخبر، يقولك أفشة وأحمد عبد القادر وعمر كمال ومصطفى العش هيروحوا فين وده ييجي مكانهم، والموضوع يبقى عامل زي حكاية ملهاش ملامح واضحة.”
وأشار: “هم رافضين المبدأ ده، وهيفضلوا رافضينه، عشان تبقوا عارفين، يعني لا أفشة ولا عمر كمال ولا أحمد عبد القادر بالتحديد هيوافقوا يطلعوا في صفقات تبادلية خالص.”
واستكمل شوبير: “واحد زي أحمد عبد القادر عقده قرب يخلص، يدخل صفقة تبادلية ليه؟ أفشة عارف قيمته كويس، عمر كمال عنده عرض فعلي من بيراميدز وده كلام مظبوط، مصطفى العش ما نعرفش الموضوع ماشي معاه إزاي، فبالتالي لا، مش هيبقوا موافقين على فكرة الصفقات التبادلية، وده موضوع مهم جدًا لازم الناس تبقى عارفة.”
واختتم قائلًا: “الدنيا بقت احتراف، أنا لعبت في النادي الأهلي وقدمت اللي عليّ وموت نفسي، لو حضرتك عايزني أكمل أقولك على الرحب والسعة، ده شرف ليا، مش عايزني أكمل سيبني أنا أختار، مفيش زعل، في ناس بتزعل مني بس أنا بقول الحقيقة، أنا راجل حر وقراري بإيدي، لو عايزني أكمل أمنيتي أكمّل في النادي الأهلي، لو مش عايزني ما تقوليش روح المكان الفلاني، أنا أروح المكان اللي أنا عايزه، إنما لو عايزني أنا موجود وبتمرن وبموت نفسي، وده لسان حال اللاعبين دلوقتي.”
