طالب أيمن يونس، نجم الزمالك السابق، بضرورة حل أزمة أرض النادي باكتوبر سواء بعودتها او منح الفارس الأبيض أرض بديله
وقال يونس،خلال تصريحات تليفزيونية عبر برنامج “زملكاوي” على قناة نادي “الزمالك”:” أنت بتتكلم على ولاد نادي الزمالك، أي ولاد نادي الزمالك إحنا في ضهرهم وبنساندهم”.
وتابع:” وبنشكر أحمد عبد الرؤوف، راجل عمل اللي عليه في حدود قدراته، مهذب ومحترم لأقصى درجة بصراحة، وبنشكره على مجهوده وتعبة والراجل مقصّرش بحدود المتاح ليه وقدراته”.
وشدد يونس: “معتمد جمال وإبراهيم صلاح مستنيين منهم كتير، ودول برضه ولاد نادي الزمالك هنديهم تشجيع وهنعمل لهم مساندة، كل التوفيق ليهم”.
وأشار:” بس أنا مش عايز أفتح موضوع كبير، لكن أنا أتمنى الهدوء يرجع للفريق، أتمنى إن الأمور كلها تتضبط في الفريق خاصة النواحي المادية”.
وواصل يونس: “بتمنى يا إما الأرض بتاعتنا ترجع الأيام اللي جاية، أو أرض بديلة مميزة.. مش عايزين الناس اللي بتضحك علينا، أوعى تاخد غير الأرض اللي كانت موجودة يا عم، حتى لو أرض بديلة مميزة تيجي”
وأردف: “والسؤال اللي يفرض نفسه: ما دام كانت الأرض هي كلمة السر لحل جميع أزمات نادي الزمالك، إزاي الأرض دي تفضل 20 أو 22 سنة عندنا ومعملناش فيها أي حاجة؟”.
وأكمل يونس:” فيه حتة صغيرة نسيناها، إن تراكم الديون هو اللي وصلك إن الاستدامة المالية تكون حلها الأرض، إيه اللي حل موضوع أرض نادي الزمالك وبقت إنقاذ؟ الموضوع كان موجود عندك من زمان، إن مجلس الإدارة عرف يبيع أو يستثمر في الأرض فقال بقى فيه فلوس، قبل كده ما كانش فيه أي نوع من أنواع الاستثمار للأرض ولا بنى ولا استثمار، فالعطلة بقالها 22 سنة”!
واستطرد:” إحنا دلوقتي عشان نختصر الموضوع ومنطولش الخلاف، لأن في الآخر ده نادي الزمالك بيرجع للبلد، نادي الزمالك جزء من التركيبة الرياضية في البلد وجزء مجتمعي كبير وكل المسؤولين مسؤولين عن نادي الزمالك”.
وزاد يونس: “فحتى لو فيه أرض بديلة مميزة في مكان مميز بنفس المساحة أو حتى أقل شوية هيبقى خلاص حل سريع، وما دام خدنا الخطوة وعرفنا نبيع لأول مرة فتبقى بداية جيدة”!
وأختتم:” إحنا عايزين نسرع ننتهي من مشاكلنا، لكن طول ما أنت عايش في المشاكل، عمر ما تغيير المدرب هو حلك”.
