عمرو أديب يهاجم بشدة حسام وإبراهيم حسن بسبب تصريحاتهم ضد المغرب: “انت افتكرت الناموس لما اتغلبت”
انتقد الإعلامي عمرو أديب بحدة التصريحات الصادرة عن الجهاز الفني للمنتخب المصري عقب المواجهة الأخيرة مع المنتخب المغربي، واصفاً الهجوم على إمكانيات الدولة المضيفة أو التاريخ الرياضي للأشقاء في المغرب بأنه أمر “غير مقبول” ويفتقر إلى الهدوء الدبلوماسي والرياضي المطلوب.
وقال أديب،خلال تصريحات تليفزيونية ببرنامج “الحكاية”،عبر قناة “mbc مصر” : “عايز أسأل حضراتكم سؤال بهدوء.. إنت لو بتعمل بطولة الأمم الأفريقية في مصر، والقطارات بتاعتك عظيمة وفنادقك عظيمة وكل واحد بيشيد بالتنظيم، وملاعب المغرب”
وتابع:” وبعدين فجأة وأنت قاعد كده، يجي مدرب منتخب من المنتخبات يقول إنه لا، التنظيم أي كلام، القطارات زي الزفت، كنا في أوتيل بنسيون البلد كلها ناموس.. إنت هتقول إيه؟ إنت كمصري هتقول إيه؟ هو إنتوا ليه مش مقدرين حجم الغضب اللي جه في الإعلام المغربي ده؟ هو ده جزاتهم اللي كانوا بيودوا الجمهور بتاعهم علشان يشجعك؟”.
وشدد أديب:” كل الناس خدت الجزء الأخير من كلام الصحفي المغربي بس مسمعوش كلامه الأولاني اللي قال له: ‘إنت قلت علينا كذا وكذا وكذا، إنت أسأت للمجهود اللي عمله كل المغاربة، إنت أسأت لمنشآتنا، إنت أسأت لدورتنا، إنت أسأت لبطولتنا، ولذلك إنت ليه مش مركز في أداءك الفقير؟’ وده صحيح، المغرب مش هي اللي إمكانياتها فقيرة، إحنا اللي كانت إمكانياتنا فقيرة في المباراة”.
وأشار:” أنا ما بتكلمش في الكورة، الفرقة اللي وصلت مرة في الدقيقة 84 مش من حقها تنتقد بطولة كاملة، وأشمعنى أنت الوحيد اللي طلعت اتكلمت في السياسة؟ أيوه في السياسة مش في الرياضة.. ليه اتكلمت عن الدولة؟ ليه اتكلمت عن المغرب؟ ليه اتكلمت عن البلد؟ ده أنا عامل لك كل حاجة، ده أنا كنت ببعت لك جمهور يقف جنبك وأنت احتمال تاخد مني البطولة، أنا كنت حتى شايف ده أمر مجنون، يعني إيه الناس الغريبة دي اللي جايين يشجعونا؟ فإنت أما تقول كده متوقع الإعلام المغربي يقول إيه؟”.
وواصل اديب: “ويطلع الأستاذ إبراهيم حسن يقول لهم إنتوا ولا مرة خدتوا بطولة! فين الروح الرياضية يا جماعة؟ عيب يا جماعة.. إنت افتكرت الناموس دلوقتي بعد ما اتغلبت؟ ده إحنا كمصريين ما بنقبلش الهواء الطاير لو حد جاب سيرة مصر.. إنت لعبت ربع اللي هما لعبوه؟ حكيمي لوحده عامل محاولات قد محاولاتك في البطولة كلها”.
وأختتم:” إنت كنت سيء وأكتر من سيء، إحنا ليه ‘Bad Losers’؟ إحنا ‘Bad Losers’.. إنت لو تشوف شكلنا في الملعب بعد الماتش، يا عم روح سلم على الناس واحضنوا وهارد لاك وبتاع، مين قال إن الحكم كان مشكلة؟ هو إنت عملت إيه أصلاً؟ يعني كنت جايب أربع خمس أهداف ولغاهم لك؟ كان ليك بينالتي وما اتحسبش؟ إنت عملت إيه؟ فين المحاولات بتاعتك؟”.
