فتح الله: كيف نشكر جماهير المغرب في بيان ثم نهاجمهم بعد 10 أيام؟..ومينفعش نقول إنجاز بالتأهل للمربع الذهبي”
انتقد محمود فتح الله، نجم نادي الزمالك والمنتخب الوطني السابق، المشهد الرياضي الحالي في أعقاب خروج المنتخب المصري من البطولة الإفريقية، موجهاً رسائل شديدة اللهجة للمسؤولين عن التصريحات الإعلامية والجهاز الفني بقيادة الكابتن حسام حسن.
”مصر أكبر من المربع الذهبي
وقال فتح الله عبر قناة “ام بي سي مصر 2″:” أنا هقولك حاجة عن تجربة يعني.. الشعب المغربي شعب محترم جداً، والجماهير المغربية جماهير محترمة جداً”
وأضاف:” الغريب في القصة، عشان إحنا رحنا ولعبنا في المغرب يعني، منهم ماتشات يا شيكا كنا حتى مع الزمالك أعتقد كنا المغرب الفاسي هناك كسبانين وبنطلع الناس بتحيينا.. الناس بتحيينا”.
وأكمل فتح: “البطولة دي بقى فيها كمية تناقض مش طبيعي.. من 10 أيام بنعمل بيان بنشكر الجماهير المغربية على وقفتها جنبنا، إيه اللي حصل خلى الرسالة تتغير؟”
وتابع:” علاقتنا أكبر من كده ولازم تتحط في إطارها إنها كورة .. يعني إحنا كل الحاجات دي بتحصل، تصريحات وكلام، ده كورة، لكن لازم نكون أذكياء ونتعلم. إنت قلت جزائر وبتاع، إحنا مش هنروح للمنطقة دي خالص، لكن أنا عايز أخسر ماتش بس، أخسر بطولة بس ما أزودهاش، ما أخسرش حاجات تانية.. حاجات تانية بتقعد سنين. أنا خسرت بطولة خلاص”.
وواصل فتح الله: “الطبيعي اللي شيكا قاله، إننا عملنا بطولة ‘معقولة’.. سمعت اليومين اللي فاتوا حد قالك وصلنا لمربع ذهبي ‘إنجاز’، وناس بتوع كورة! يا جماعة إنتوا كده بتهزقونا، مصر، مينفعش تصعد مربع ذهبي وتقول إنجاز”.
وزاد:” كلمة إنجاز دي لو بوتسوانا اللي خدت البطولة ده إنجاز، تنزانيا خدت البطولة إنجاز، بس مصر تصعد مربع ذهبي تقولوا إنجاز؟ يا جماعة كل كلمة بتطلع من الناس النجوم وناس تقال بيطلعوا في الإعلام، الموضوع بقى محسوب.. إنجاز إيه؟ فين الإنجاز في كده؟ حتى لو إنت من جواك حاسس مبتقولهاش، متقللناش كده”.
و أستطرد فتح الله'”كابتن حسام عمل مجهود، عمل حسنات وحاجات إيجابية في البطولة، وعمل سلبيات كتير في البطولة.. منها بعد الهزيمة لازم نكون أذكى من كده، تصريحاتنا محسوبة”.
و أردف: “الناس بتبقى عايزة في الأوقات دي تسمع إحنا خسرنا ليه بالظبط، عايزك تسمع وهتسمع من مين؟ من المدير الفني، هتقتنع بكلام المدير الفني،المدير الفني هو المسؤول؛ أنا عملت كذا وكذا، وعملت إيه كويس وعملت إيه غلط وخسرنا ليه، وكان وجهة نظري إيه”.
وأستأنف فتح الله:” الكلام كان بعد الماتش ملوش علاقه.. أنا يمكن مسمعتش، بس معرفش، مسمعتش جملة عن الماتش، مسمعتش جملة إحنا عملنا إيه ولعبنا إزاي وإيه طريقتي وإيه فلسفتي وإيه أسلوبي.. مسمعتش أي حاجة في الكورة”
وأتم:” كلها حاجات بره الكورة وده ميلقش بينا شوية.. ميلقش بينا. كنا نقدر نبقى أحسن من كده أياً كانت النتيجة، إنت ممكن تخسر من السنغال على فكرة، بس كان ممكن يبقى شكلنا أحسن من كده، كان ممكن يبقى لنا الكورة معانا، يبقى لنا شكل وهوية وبنحاول”.
