“لا أقبل المؤقت ولا أعمل مساعدًا لأي مدرب”.. طارق مصطفى يحسم الجدل ويصدم الزمالك بأسباب رفضه! فيديو
فجّر الإعلامي أحمد شوبير مفاجآت من العيار الثقيل بشأن كواليس ملف المدير الفني لنادي الزمالك، كاشفًا تفاصيل حديثه المباشر مع الكابتن طارق مصطفى، الذي وضع النقاط فوق الحروف وحسم موقفه بشكل قاطع من تولي القيادة الفنية للفريق.
وقال شوبير في تصريحات عبر برنامجه الإذاعي اليوم الخميس: “قرار المجلس إنه يعين كابتن معتمد جمال قائماً بأعمال المدير الفني ويعاونه كابتن إبراهيم صلاح، واشتغلوا إمبارح فعلاً على استاد الكلية الحربية وبيقولوا لحين تعيين مدير فني أجنبي”.
وتابع: “أنا الحقيقة كلمت كابتن طارق مصطفى، يعني أول حاجة عملتها كلمت كابتن طارق: يا كابتن الدنيا أخبارها إيه والحدوتة إيه؟ طارق مصطفى، قالي: والله يا كابتن أنا محدش كلمني رسمي من داخل نادي الزمالك”.
وأضاف: “قلتله: طيب بس التوقعات كلها كانت بتقول إن أنت جاي، قالي: آه أنا كنت متوقع كده، بس أنا يا كابتن مجيش مدير فني مؤقت، أنا آجي مدير فني الفترة كلها، لازم يتعملي عقد (يقصد عقد طويل) لكن مجيش مدير فني مؤقت، أمسك ماتشين تلاتة أربعة وبعدين يجيبوا مدرب وأبقى مساعد لمدرب سواء أجنبي أو مصري.. لا ده مش موجود عندي في سكتي”.
وواصل: “قالي : أنا خلاص، أنا زمان كان ممكن، بعدين شقيت طريقي بقى لوحدي، فأنا مينفعش أبقى مدير فني مؤقت ومينفعش يعني أبقى مساعد لحد. طيب ماشي تمام”.
وأردف شوبير حديثه: “طيب كابتن طارق أنت يعني حد مثلاً من جانب المجلس كلمك؟ قالي: لأ “.
واستمر شوبير: “قلتله: طيب أنت إيه علاقتك بجون إدوارد؟ قالي: أنا جون إدوارد اتكلمت معاه مرتين في حياتي… قلتله: طيب كان إيه بخصوص إن أنت تدرب نادي الزمالك؟ قالي: لا، ده هو كان مسؤول كنا بنجيب لعيبة للبنك الأهلي ساعتها اتكلمنا بخصوص أظن الزناري ومصطفى شلبي، ودول المرتين اللي حصل الحوار بيني وبين جون إدوارد، لكن قالي ليس لي علاقة به لا من قريب ولا من بعيد”.
وأشار: “قلته: طب يعني هل هو مثلاً أنت كنت هتجيب مدير كورة معاك؟ قالي: طبعاً كان هيبقى معايا كابتن طارق يحيى، وده أمر كان ممكن يغضبه”.
وشدد: “أنا عندي جهازي اللي بحب أشتغل بيه، وأنا ارتحت في الشغل مع الكابتن طارق يحيى، طارق يحيى كان مدير فني عليا وأنا كنت مساعد ليه، وبعدين بقى مدير كورة معايا وشغله مريح جداً وفاهمني كويس، وأيضاً لن أسمح لأحد بالتدخل في عملي على الإطلاق مع كل الاحترام للناس كلها”.
واستمر: “فقلتله: طب طارق أنت قلت أكتر من مرة إنك نفسك تدرب نادي الزمالك؟ قالي: طبعاً نفسي أدرب نادي الزمالك”.
واختتم شوبير الحوار: “قلتله: حتى رغم الظروف الصعبة؟ قالي: حتى رغم الظروف الصعبة، الزمالك خيره عليا وأنا عندي أكتر من حل إن شاء الله لحاجات كتيرة جداً، بس هبقى محتاج شوية صبر عشان الدنيا تمشي بشكل جيد، والزمالك أرجع أقول لك الزمالك فرقة جيدة وفرقة قادرة إنها تفوز بامر الله وتكسب وإن شاء الله يستعيد مكانه ومكانته مرة تانية… ده كلام طارق مصطفى معايا”.
