محمد أبو العلا: “لو كانت مشاكل الزمالك في الأهلي مش هبقى سعيد”.. ورسالة عاجلة لجماهير النادي
أكد محمد ابو العلا، مقدم البرامج، ان الزمالك يوجه تحدي صعب ويعاني من أزمات كثيرة لوكان بيمر بها الأهلي لن يكون سعيد، ووجه رسالة لجماهير الفارس الأبيض.
وقال أبو العلا، خلال تصريحات تليفزيونية عبر برنامج “زملكاوي”، على قناة” الزمالك”:” دخلنا عام 26 وطبعاً تاني يوم في السنة كل سنة وحضراتكم طيبين، لكن داخلينه كده من البداية نادي الزمالك بتحديات كبيرة قوي.. واضح إن السنة من بدايتها مليانة بتحديات، والحقيقة ده مش جديد على نادي الزمالك، لكن التحديات دلوقتي بقت واضحة وضوح الشمس فنية وإدارية بتفرض نفسها، وبتحتاج وعي جماهيري”
وأضاف: “الجمهور محبط مفيش شك، لأن اللي بيحصل فينا غير طبيعي وغير تقليدي ومش موجود في كل الفرق اللي بتنافس في العالم كله؛ ما فيش الحالة اللي بيعيشها نادي الزمالك. لكن أرجوكوا نستمر في موضوع وعينا.. وعينا بالمشكلة وإحنا واقفين في أنهي نقطة”.
وأردف أبو العلا:” إنت ممكن تكون بتعمل كل اللي عليك لكن الظروف مصممة إنها تقف ضدك، وعوامل متكررة بسيناريوهات متكررة على مدار سنين طويلة بتعطلك وبتحاول تاخد من حجم نادي الزمالك، وده إن شاء الله مش هيحصل. لكن وعي جمهورنا بيفرق، وسبحان الله اللي مخلي النادي ده مكمل هو إن جمهوره دايماً موجود ومساند”.
وأشار:” اتعودنا إن الزمالك بيمر بكبوات رهيبة، والبعض كان بيتخيل إن دي نهايته، وسبحان الله دايما بيفاجئنا بانتفاضة ورجوع ببطولات، وده السر العظيم بتاع نادي الزمالك. افتكروا الـ 20 سنة اللي فاتوا، رغم كل اللي بيتعرض له النادي لكنه موجود وفرض نفسه والكل عامله حساب”
وشدد ابو العلا:” أول ما النادي يبدأ يفوق تلاقي ناس بتختلق أزمات ومشاكل ومحاولات تفتيت داخلية. محاولات تقسيمنا من الداخل دي خطيرة جداً.. إحنا بندور في فلك لا ينتهي بقالنا سنين طويلة، وده كلام ناس متعلمين؛ عندنا حاجات بالورقة والقلم والأرقام والتواريخ تقول إن اللي اتعمل فينا ما ينفعش يتعمل في حد”
وواصل:” إحنا مش هنزهق إننا نعيد نفس المشكلة ونطالب بحلول وإرادة حقيقية وناس تتحمل المسؤولية بجد. لو الكلام ده بيزهقك، ما إنت سايبني في ظروف مزهقاني بقالها 20 سنة وأكتر.. أنا بتكلم بلسان اللعيبة اللي موجودة دلوقتي واللي كانت موجودة، لأني شفت الأيام دي ودقتها كأحد أبناء النادي”
و أستأنف أبو العلا:” أنا لو أهلاوي وعندي كل المشاكل دي في النادي المنافس والله مش هكون مبسوط، الكورة مالهاش طعم من غير زمالك وأهلي. اللي عقليته محدودة بيفرح من تأخر الزمالك، لكن الزمالك كيان كبير وقطب مهم للرياضة المصرية كقوى ناعمة”
وزاد:” من الرشد والعقل إن يكون فيه استجابة لمطالب نادي الزمالك المشروعة، لأن مش معقولة على طول بعاني عشان أتنفس وعشان أعيش. نفسي نتكلم بالمنطق ونخرج من ‘دائرة اللامنطق’ والسباب والقضايا وصفحة الحوادث اللي الزمالك متصدرها بسبب عقليات محدودة”
وأتم أبو العلا:” بقول لجمهور الزمالك معلش موجة صعبة وهتعدي، لكن لغة الخطاب لازم تتغير والوعي يتغير ونتكلم عن حقوقنا بمنطقية وإلحاح، ومحتاجين رغبة حقيقية لتحريك الجمود والفلك غير المفهوم اللي بنمر بيه”.
