سلّط الإعلامي أحمد شوبير الضوء على حالة الجدل داخل النادي الأهلي بشأن التعاقد مع مهاجم أجنبي جديد، كاشفًا تضارب المعلومات حول الصفقة المنتظرة، إلى جانب آخر تطورات مستقبل حمزة عبد الكريم وجراديشار.
وقال شوبير: “لكن لسه حتى هذه اللحظة الكلام ده مش هيبان إلا لما الولد يلعب مع النادي الأهلي. فبالسؤال.. كلام أنا عندي معلومتين عكس بعض: المعلومة الأولى إن مفاوضات المهاجم الأجنبي فشلت، دي خلاص معلومة جيالي من داخل الجهاز، وإن جراديشار مكمل، وبالتالي فيه جراديشار وفيه محمد شريف، آدي 2”.
وأردف: “كان حمزة عبد الكريم لحد امبارح بالليل مكمل مع النادي الأهلي، ثم فابريزيو رومانو الصحفي الشهير في الانتقالات قال لك إن الكلام تجدد وإن الولد احتمال كبير تاني ينتقل قبل نهاية الانتقالات إلى نادي برشلونة. أنا أكتر واحد بيتمنى ده، لكن أنا بقول لك إن المعلومة الأولى اللي عندي إنه لا، هو احتمال كبير عشان مش عارف اللعب المالي النظيف ومش عارف إيه، فحمزة يكمل حتى نهاية الموسم مع النادي الأهلي”.
واستكمل: “لكن ما كتبه فابريزيو رومانو هو كلام موثق وبيجيب معلوماته من هناك، ده بيجيب بقى من برشلونة، فقال العكس، قال إن الولد احتمال كبير جدًا خلاص الأمور تتم على خير. لكن هنا السؤال: هل الأهلي أتم الاتفاق مع مهاجم أجنبي؟ وطلع بقى مهاجم تاني وتالت ورابع وعاشر وألف”.
واستمر: “كان المهاجم ده بتاع هولندا فعلًا تابعه النادي الأهلي، لكن تورب قال لك: لا لا، ده مرفوض تمامًا، ده ميكونش موجود عندي. وأنا امبارح قلت لك الصبح الكلام ده، إن ده اسمه مونزيالا أو حاجة كده، متأسف يعني، مش هيبقى موجود في النادي الأهلي”.
وشدد شوبير: “طيب هل إنت هتجيب مهاجم أجنبي فعلًا ولا ده اجتهاد؟ حد قالهولي كمان، أنسبه لصاحبه الصحفي الكبير علاء عزت، قال لي: لا، سيد عبد الحفيظ عائد أو رجع امبارح أو راجع النهاردة الصبح وهيجتمع مع تورب، وإنه خلاص خلص مهاجم أجنبي، ومهاجم أجنبي جيد وهيبقى مكسب للنادي الأهلي”.
واختتم: “وإذا حدث، فالأهلي وافق على إعارة جراديشار إلى نادي مجري، والأهلي هياخد 250 ألف دولار أو 250 ألف يورو مقدمًا، وبعد كده أظن ياخد مبلغ زيه في إعارته للنادي المجري. وعلى فكرة جراديشار مرحب جدًا إنه يلعب في المجر، أنا كنت متخيل إنه ممكن يرحب ببولندا عشان هناك زمايله، لكن هو مرحب بالدوري المجري، كلامه من جوه: أنا شايف لعيبة كويسة وشايف فرقة كويسة، وإن ده هيساعدني جدًا في موضوع إن أنا أكون متواجد دايمًا في المنتخب، لأنه أول مرة يروح المنتخب الأول من خلال لعبه للنادي الأهلي”.
