ميدو يوجه رسالة هامة بشأن منتخب مصر بعد التأهل لربع نهائي إفريقيا ويؤكد “تطورنا بطئ”
تحدث أحمد حسام ميدو، عن تأهل منتخب مصر، إلى ربع نهائي بطولة كأس الأمم الأفريقية 2025، بعد الفوز على بنين بنتيجة 3-1 في دور الـ 16.
وقال ميدو، خلال تصريحات تليفزيونية عبر برنامج “اوضة اللبس”، على قناة” النهار”:* ألف مبروك لمنتخبنا الفوز على منتخب بنين 3-1 والتأهل إلى دور الـ 8، في مباراة أداؤنا فيها كان متوسطاً ولكن استطعنا إن إحنا نحقق هدفنا من المباراة وهو التأهل إلى الدور القادم”.
وأضاف:” وطبعاً أنا عارف إن حضراتكم أكيد كلكم وأنتم بتتفرجوا على الماتش وأنتم بتتكلموا مع بعض بعد الماتش عندكم أكيد حالة من القلق على أداء منتخبنا”.
وأكمل ميدو: “ويمكن القلق اللي موجود عند حضراتكم ده لأن معظمكم ومعظمنا لسه بيفكر في الكورة الأفريقية والمنتخبات الأفريقية والفوارق اللي كانت موجودة في المستوى ما بين منتخبات الفئة الأولى والمنتخبات اللي بتيجي بعد كده كانت كبيرة جداً”!
وشدد:” فالنهارده فيه ناس كتير بتتفرج بتقول لنفسها: “إحنا إزاي مش عارفين نكسب بنين دول بسهولة؟ إزاي مش عارفين إن الماتش بالنسبة لنا إننا نكسب سكور والشوط الأولاني نخلصه تلاتة؟””!
وتابع ميدو:” فإجابتي لكل الأسئلة بتاعة حضراتكم دي بتتلخص في جملة واحدة: “أفريقيا اتغيرت.. الكورة الأفريقية اتغيرت”.
وواصل:” المنتخبات الأفريقية بقى عندها -كل منتخب من اللي حضراتكم بتشوفوهم دول: تنزانيا، بنين، موزمبيق، زيمبابوي- عندهم لا يقل كل منتخب منهم عن 40 أو 45 لعيب محترف”
وزاد ميدو:” وطبعاً مش كلهم عندهم لعيبة بنتفرج عليهم في الدوريات الكبرى، ولكن وجود لعيبة في الدوري الفرنسي في الدرجة التانية، في الدوري البرتغالي في الدرجة التانية، في الدوري الألماني، النمساوي، السويسري.. بيخلي اللعيبة دول أسلوب لعبهم والوعي التكتيكي بتاعهم عالي جداً”؟
وأشار: “لأنه بيتدرب كل يوم وبيحتك كل أسبوع أمام فرق أوروبية فبيتدرب تحت إيد مدربين دارسين تدريب على أعلى مستوى. فكنا زمان حتى وإحنا بنلعب كنا بنبقى عارفين إننا النهارده بنلاعب زيمبابوي، موزمبيق، بنين، بوركينا.. كنا عارفين إن اللعيبة دول هيغلطوا، وما عندهمش وعي تكتيكي وبيقفوا غلط في الكور الثابتة، وهو ده اللي كان مع فرق الإمكانيات ما بيننا وما بينهم كنا بنخش نكسب المنتخبات دي بكل سهولة”؟
وزاد ميدو:” وإحنا تطورنا بطيء من حيث قوة المسابقة المحلية اللي هو منتخبنا بيعتمد عليها بشكل كبير جداً في 70 أو 80% من السكواد بتاعنا”.
وأتم:” ومجموعة اللعيبة اللي موجودة معانا في المنتخب الأول عدد غير كافي من المحترفين في أوروبا، والناس بتتفرج على الماتشات بتتفرج على لعيبة الأهلي وبيراميدز والزمالك اللي هم بـ “بيأزأزوا” أفريقيا بأسنانهم.. ماتشات بتبقى كلها لغاية لما توصل النادي الأهلي وبيراميدز في بطولة أفريقيا أبطال الدوري، أول ماتش صعب بيلعبوه في السيمي فاينال (نصف النهائي)، صح ولا لا؟”.
