كشف مصطفى أبو زهرة عضو مجلس إدارة اتحاد الكرة المصري، حقيقة وجود أزمات في تنظيم بطولة كأس الأمم الإفريقية 2025 بالمغرب.
وقال أبو زهرة، خلال تصريحات تليفزيونية عبر قناة “أون سبورت”:” الحمد لله طبعاً إحنا الإنجاز بالنسبة لنا إننا ناخد البطولة، ولكن وجودنا في المربع الذهبي أمر طبيعي.. إحنا مصر. إحنا رُحنا البطولة من أول يوم لآخر يوم، وده وضع طبيعي وهي منافسة في الأول وفي الآخر. بشكر كل اللعيبة كانوا رجالة من أول يوم لآخر يوم”.
وأضاف: “بشكر محمد صلاح.. أنا كل مرة كنت بطلع أتكلم عن اللعيبة كلها ماكنتش حابب أتكلم عن حد بعينه، ولكن محمد صلاح في المعسكر ده كان نموذج لمصر جدع وشال شيلة كبيرة جداً وكان حافز جامد جداً للعيبة. بتمنى منه إنه يفضل موجود أفضل فترة ممكنة، عنده خبرات وعقلية مميزة جداً”.
وأردف أيو زهرة:” صلاح قلبه على البلد وأبدى تعاون في كذا ملف، وقال ‘أي حاجة محتاجينها مني في اتحاد الكورة تحت أمركم، أي حاجة تخدم الكورة في مصر أنا موجود”.
وبشأن عن حقيقة أزمات التنظيم في المغرب وفندق الإقامة؟ أكد:” إحنا ناس كبيرة مينفعش نقول غير الحقيقة.. الناس استضافتنا أحسن استضافة، الفندق كان مميز جداً ومعروف في طنجة إنه من أميز الأماكن، ومينفعش نقول غير اللي حصل والناس كانت متعاونة معانا بشكل كبير”.
وواصل أبو زهرة:” يعني مينفعش نِحمل الناس حاجة محصلتش. الاستقبال كان من الجانب المغربي رائع جداً، وبالنسبة لنا مباراة السنغال هي مباراة كورة في الملعب، ولا بَحمل حكم ولا بَحمل حد”.
وأكمل: “عن “تصفير” الجمهور المغربي على السلام الوطني؟ بشكر دولة المغرب بغض النظر عن اللي حصل النهاردة.. طبعاً موضوع التصفير على السلام الوطني ده غلطة كبيرة عندهم والمفروض أنا منتظر منهم رد فعل عليها، ولكن هما استضافونا في الأول على أعلى مستوى، اللقطة الختامية دي مكنتش حلوة”.
وأشار أبو زهرة:” عن استمرار حسام حسن ومستقبله؟ كابتن حسام حسن مدير فني لمنتخبنا في كاس العالم إن شاء الله، خلاص ده قرار نهائي من اتحاد الكورة”.
وزاد'” عن الترتيبات والمباريات الودية القادمة؟ إحنا كل حاجة كنا مرتبينها قبل ما نيجي.. المعسكرات دي مترتبة قبل ما نيجي وفي بعض اللمسات اتحطت وإحنا موجودين هنا.. فيه ماتشين في مارس (السعودية وإسبانيا)، وبعدين تجمع تاني قبل يونيو ماتش البرازيل وماتش تاني احتمال يكون النرويج.. يعني فيه 4 ماتشات جايين قبل كاس العالم”.
وأتم:” المنتخب هيغادر بكرة المغرب الساعه 2 الظهر وبشكر الجميع هنا في بعثه منتخب مصر كله كان منضبط وعلى قدر من المسؤولية”.
