وجه مقدم البرامج محمد أبو العلا، سؤال ناري لرابطة الاندية واتحاد الكرة بسبب ضغط مباريات الزمالك ولعب 6 مباريات في 15 يوم.
وقال أبو العلا، خلال تصريحات تليفزيونية عبر برنامج “زملكاوي”، على قناة نادي” الزمالك”:” اللي أنا فيه ده، ومفيش أي نوع من أنواع الحقيقة الرحمة .. دلوقتي بتبدرلي ماتش وتفاجئني النهارده يوم 6 فبراير.. يعني قبليها بخمسة أيام بتلعّبني ماتشين في الخمس أيام دول، فيهم سفر وأنا جاي من زامبيا ألعب يوم 11 ماتش برضه قوي في الدوري مع سموحة. آجي بقى يوم 14 تحطلي ماتش كايزر تشيفز، وماتش قد يكون ختام في المجموعة”.
و تابع: “لو جبنا الجدول تاني؛ أنا عندي من 4 فبراير ليوم 20 فبراير ست ماتشات في 15 يوم.. اديني عقلك أنهي جسم يستحمل الكلام ده؟ وعايز دوري في العالم يجيلي بالمواصفات دي. حتى الفرقة اللي بتلعب بره وجوه في أوروبا، هات لي دوري بيتلعب بالطريقة دي”.
وشدد ابو العلا:” الكلام ليس له علاقة بالمنطق والله، وليس له علاقة بالآدمية من وجهة نظري كواحد كان لعيب كورة وعارف بيحس بإيه. ساعات الواحد محتاج نفس، محتاج العضلة تستشفى شوية، محتاج أريح الجهد العصبي”.
و اشار: “ومش بس الزمالك، أنا عرفت إن النادي المصري مطلع بيان النهاردة مش موافق على ماتش يوم 11.. وبرضه ده ممثل للكرة المصرية في الكونفدرالية. شفت السنة اللي فاتت شهر خمسة لما بيراميدز خد نهائي أفريقيا، اتحط له برضه ماتش بين النهائيين وكان بيلاعب فريق من جنوب أفريقيا”.
وزاد ابو العلا:” في حين لما كنا بنشوف لوكشة ماتشات بتترحل لآخر الموسم، تلاقي نادي بعينه بيلعب لوحده دوري لوحده كل أربع أيام ماتش بعد أما كله خلاص قفل ومفاتيحه خلصت والدوري اتحسم، كان المفروض يبقى فيه تعامل أكتر من كدة، وأنا بدعو نادي الزمالك إنه ياخد قرارات كبيرة جداً بخصوص ماتشات يوم 11 و17 تحديداً اللي هم عاملين المشكلة كلها”.
وأكد:” كلام يعني عبث عبث والله في الكورة، فطبعاً تسلسل غير متوازن للماتشات.. يعني كلام بفاصل زمني لا يتجاوز يومين فقط بين كل مباراة وأخرى، وده اللي هيخليه فريق وحيد في مصر اللي هيواجه هذا الضغط في الفترة دي. تخيلوا يعني إنت الفريق الوحيد المصري اللي هتلعب هنا في الدوري المصري لكن محكوم عليك تلعب بنظام مختلف عن اللي كنا بنشوفه سابقاً كممثلين لمصر”.
و واصل أبو العلا: “على فكرة الزمالك مش بيطالب بامتيازات وده أنا بأكد عليه، ومش معترض على ضغط المنافسات، إحنا عارفين طبعاً ضغط ماتشات طبيعي بدليل إن إحنا موجودين ومجهزين لعيبة الشباب والصغيرين وابتدأنا نجهز ونحضّر نفسنا على قد ما نقدر”.
و أكمل:” أتمنى أتمنى نعمل حاجة جديدة اسمها ‘تنسيق عادل’ ما بين رابطة الأندية واتحاد الكورة، وكمان يبقى فيه احترام للوائح اللي كانت موجودة ودي بندعو ليها طبعاً من الموسم اللي فات، واحترام للجداول اللي محطوطة علشان شوية نقدر نتعامل”
و استأنف:” اللي أنا الحقيقة مش قادر أسميها أزمة وتعدي، أنا شايف لازم يتوقف عندها وتتبروز، ويتجاب تسجيلات الممثلين عن رابطة الأندية كانوا بيتكلموا قبل كدة بخصوص الماتشات الخارجية. الحقيقة مش ماشية معانا كلمة اللي هو إيه ‘بناشد ونشجب’ والكلام ده، لأ أنا بالنسبة لي الكلام ده الحقيقة ماياكلش عيش من وجهة نظري”.
وأختتم:” لأن إنت بسبب الضغط ده، إنت ممكن تلاقي نفسك خرجت من التلات منافسات، فمعرفش الحقيقة دي قصة يعني بتتعمل لوحدها ولا فيه حاجة ورا الستارة؟ والسؤال ده محتاج كتير يعني إجابة مهمة جداً من وجهة نظري”.
