وجه ابراهيم حسن مدير منتخب مصر، رسالة قوية إلى إمام عاشور،لاعب الأهلي،بعد أزمته الأخيره مع ناديه،وطالب الأحمر بضرورة عقد جلسة معه لإحتواءه.
وقال حسن،خلال مداخلة هاتفية عبر قناة “أون سبورت”:” إمام جواه طفل، يعني هو طيب جداً. ممكن يكون فيه حد مثلاً بيجي من فترة لفترة كده يحاول يديله معلومة غلط، أو يخليه -بلغة الكورة- ‘بيسخنه’ مثلاً إنك إنت تقول عايز كذا أو أنا زعلت إني ما عملتش كذا.. أنا بتكلم كأي مواطن أو مشجع بيشوف الماتشات .. مش عارف هو زعلان علشان ضربة جزاء ولا علشان ايه”.
و أضاف:” لكن أنا زعلان.. يا ريت يبقى سامعني يا إمام. إحنا تعبنا كتير وإنت تعبت كتير جداً عشان توصل للفورمة صح. وإنت أول ما جيت معانا في التجمع كنت بتبدأ من الصفر، يعني من تحت الصفر كمان، ليه؟ لأنك كنت جاي لسه -ربنا يشفيك- كنت جاي تعبان جداً”
وواصل حسن:” إمام يا ريت يسمع: ركز، كل حاجة كويسة هتجيلك وإنت واقف على رجليك وإنت الناس كلها فرحانة بيك إنك بتكسب الفريق اللي معاك”.
وشدد:” إنما هتبعد.. كل ما تبعد بعد أما رجعت لفورمتك بنسبة كبيرة جداً، هترجع تاني من الصفر ودي حاجة مش كويسة. أنا شايف إن إمام يراجع نفسه وبسرعة لأن الوقت ضيق جداً”.
و أردف حسن:” ليه؟ لأن عنده التزامات مع النادي الأهلي وعنده التزامات مع منتخب مصر. فإنت عشان هنبدأ من الصفر عشان ترجع لفورمتك تاني إنت الخسران، وفي نفس الوقت إنت هتأذي المنظومة كلها إنك من ضمن العناصر القوية اللي تبقى موجودة في المنتخب”.
و أشار:” لازم هتلاقي نفسك مش هتعرف تلم نفسك لأنك هتلعب في مستوى عالي جداً، مستوى أعلى كمان من كاس الأمم. إحنا كنا بنقول كاس الأمم شراسة ومستوى فوق الوسط، إنما إنت رايح على مستوى كاس عالم، فإنت لو ما كنتش جاهز طب هتعمل إيه؟”.
وأكد حسن: ” انا شايف مطلوب طبعاً -وهم أحرار أكيد في النادي الأهلي- يبقى فيه اجتماع بـ إمام ويبقى لو الغلط حصل منه يبقى فيه مثلاً اعتذار لجماهيره واعتذار للنادي بتاعه بحيث إن الناس كلها اللي زعلانة منه تسامحه”.
وأتم:” الموقف حساس جداً فما ينفعش نكلمه في الوقت دوت إلا أما يحدد هو بنفسه هياخد قرار إيه مع النادي بتاعه”.
