أشاد الإعلامي إبراهيم فايق،بجماهير الزمالك ومعتمد جمال المدير الفني للفارس الأبيض، بعد الفوز على كايزر تشيفز والتأهل لربع نهائي الكونفدرالية.
وقال فايق، خلال تصريحات تليفزيونية عبر قناة “ام بي سي مصر 2″:” النهارده الزمالك يحقق انتصاراً جديداً مهماً جداً ويتاهل للدور المقبل في البطولة الكونفدرالية”.
وتابع: “فتش دايماً عن جمهور الزمالك، دور على جمهور الزمالك في أي مشكلة وفي أي أزمة وفي أي محنة، دور على جمهور الزمالك هتلاقيه دايماً في ضهر فرقته، هتلاقيه دايماً ورا المكسب”.
و واصل فايق:” هتلاقيه يقولك: خد بالك أنا شهر فبراير مضغوط، أنا عندي ماتشات ورا بعضها، ثلاث ماتشات خدهم نادي الزمالك تحت ضغط كبير جداً جداً، ولسه فاضله ماتشين صعبين برضه”.
و أكمل: “بس تمام هو جاهز، الجمهور ده جاهز ما عندوش مشكلة ما عندوش أزمة، أنا واقف في ضهرك أنا معاك، عندك أي مشكلة في أي حاجة أنا معاك أنا في ضهرك”.
وشدد فايق:” فالجمهور ده اللي بيهز الصخر، ده اللي بيحرك الصخر.. الجمهور ده النهارده واقف مع فرقته بيصعد من البطولة الكونفدرالية من مرحلة المجموعات بعد ما كان يعني أقصى المتفائلين يقولك لا دي مش هتظبط معانا، النهارده بيكسب 2-1 وبيقدم أداء مميز جداً جداً”.
وأختتم:” طب لما أنت تقف عند الأداء المميز جداً ده هتلاقي إيه؟ هتلاقي الكابتن معتمد جمال. الراجل ده يا جماعة سبحان الله، هي مش بس بتبقى أقدام، هي أقدام وذكاء ونوايا صافية وشغل واجتهاد. كابتن معتمد جمال مع نادي الزمالك عمل ماتشات، فاز في ستة، لعب ماتشات فاز في ست ماتشات، اتعادل في واحدة وخسر واحدة. لعيبة الزمالك مع كابتن معتمد جمال سجلت 14 جول وتلقى الزمالك خمس أهداف فقط لا غير”.
