رد حسام المندوة، أمين صندوق نادي الزمالك على السؤال الاصعب الفارس الأبيض إلى اين،في ظل الظروف التي يعيشها النادي.
وقال المندوة، خلال مداخلة هاتفية عبر برنامج “ملعب أون”، عبر قناة” أون سبورت”: “حقيقي فرقة نادي الزمالك دي فرقة “المجاهدين”، يعني في ظل الظروف الصعبة، الإصابات الكتيرة، وتكدس المباريات اللي ورا بعضها، والسفر اللي بالساعات من زامبيا.. يعني حقيقي ظروف صعبة، ولكن الظروف الصعبة دي هي اللي دايما بتأكد لنا إن أبطال نادي الزمالك كل مرة إن شاء الله بيتغلبوا عليها.
واضاف:” وإن شاء الله الماتش اللي جاي، إحنا طبعاً دعم الجماهير مهم جداً جداً. شايف إن في حملة معمولة عشان دعم كل من ينتمي للزمالك في المباراة اللي جاية دي، ودي فرصة إننا نوحد الصف كلنا مع بعض، لأن فعلاً المباراة محتاجة الجميع يتكاتف فيها عشان الفوز. إن شاء الله نكسب ونكمل وإن شاء الله نحتفل بالبطولة دي.
واجاب المندوة على سؤال الزمالك على فين؟،قائلا: الزمالك بيمر بظروف صعبة يا كابتن سيف، وإحنا يمكن قعدنا مع حضرتك قبل كده مرة أو اتنين أو أكتر واتكلمنا في الأمور دي كلها. وساعات بتبقى في ظل الظروف الغير مستقرة، بترسم خطط معينة و”تأتي الرياح بما لا تشتهي السفن” في بعض الأوقات، فعليك مواجهة المواقف دي كلها. ودايما بنقول أسهل شيء في أي وضع إنك لا تواجهه، يعني تمشي وتسيبه”.
وشدد:” إنك مرة واحدة خلاص يا جماعة نمشي ونسيب الموضوع، ده أسهل قرار. ولكن إحنا حقيقة الأمر من يوم ما دخلنا وعارفين إن ظروف النادي صعبة جداً جداً، حطينا خطط، وخطط أنتجت عن ثمرات كتيرة شفناها وعشناها، ولو تفتكر من فترات الناس استغربوا “هم جابوا الفلوس دي كلها منين؟ وعملوا ده إزاي؟ وفكوا القيد إزاي؟ وجابوا اللعيبة دول إزاي؟”.
وواصل المندوة:” وبعد كده ندخل في كبوة تانية يحصل انتقاد، ثم نعدي من الكبوة فيُقال نفس الكلام. الموجات العالية والهادية اللي بنمر بيها بتعبر عن إن النادي في حالة مشكلة موجودة بسبب عدم الاستقرار المالي اللي بنمر بيه، واللي بنحاول باستمرار برغم إننا وفرنا من يوم ما دخلنا أكتر من 2 مليار ونص جنيه، ولكن برضه التحديات أعنف بكثير جداً فالزمالك على فين؟ ده سؤال مهم”.
واشار:”. الزمالك محتاج -وأنا بأكد على الكلام ده- إن كل الزملكاوية؛ جماهير، أعضاء جمعية عمومية، لاعبين، رموز، كلهم يكونوا متحدين ويثقوا في هذا المجلس، ويثقوا إن الاستقرار هو نجاة نادي الزمالك. بدون استقرار مش هيكون في نجاة لأننا هنفضل نتخبط كتير. في أزمات موجودة حالياً بنسعى لحلها”.
و اختتم المندوة:” وإن شاء الله يكون في أمور كويسة مرتبطة بالاستثمارات في نادي الزمالك، اللي هي من وجهة نظرنا الحالة الوحيدة اللي تخلينا نتسم بسياسة مالية منضبطة؛ إن يكون عندنا نماذج عقارية موجودة زي الأندية الأخرى. الزمالك مر بفترات زمنية طويلة قبل كده ولم يكن هناك نجاح في الاستثمار ده، بغض النظر مين اللي أخطأ، ده مش موضوعنا، ولكن هذه هي المشكلة، فإحنا مصممين نستثمر بالطريقة دي وإن شاء الله يكون في قريب أخبار جيدة”.
