أطلق الإعلامي خالد الغندور انتقادات حادة لما يمر به نادي الزمالك في الفترة الحالية، معتبرًا أن المشهد العام داخل القلعة البيضاء يعكس تراجعًا واضحًا في سقف الطموحات، في ظل الأزمات المالية والاستغناء عن عناصر مؤثرة، وهو ما يضع الفريق أمام واقع صعب مع استمرار المنافسات.
وقال خالد الغندور في تصريحات عبر إذاعة «أون سبورت إف إم»: “الزمالك كده بيقول بشكل رسمي أنا مش هنافس على الدوري، ولو سمحتوا يا جمهور الزمالك أنا مش هنافس على أي بطولة، أنا ببيع لاعيبتي المهمة عشان محتاج فلوس، بعت ناصر ماهر لبيراميدز، وأول ماتش ليه في دوري أبطال إفريقيا عمل أسيست وجاب جول قدام أقوى فريق بينافسني اللي هو نهضة بركان”.
وتابع: “أنا عندي مشكلة في مركز رقم 6، دونجا ماشي، ومحمود جهاد مصاب وعايز أبيعه، وشحاتة مصاب وهو أصلاً مش 6، وعبد الله السعيد راجع من إصابة وهو عمره ما كان 6 ده 10، ووظفته 8 ومينفعش ألعبه 6، وأحمد كوكا أحسن مكان ليه 10 ولو لعبته 8 أو جناح مش هيعرف يقدم”.
وأضاف: “كمان أحمد ربيعة مصاب وهو 6، فإحنا داخلين ماتشات وهنلعب بأي حد في النص وخلاص، ودونجا همشيه عشان القيد هيقفل في السعودية، يعني أنا مش عايز أنافس، أي نادي بينافس بيقوي فرقته مش بيضعفها، بيزود اللعيبة التقيلة في الـ11 مش يقللهم”.
وواصل الغندور: “بس الحقيقة إن عندي مشاكل مالية كبيرة، عندي حوالي 13 قضية بمبالغ كبيرة، وأنا ببيع اللعيبة عشان أسدد، ولسه عليا فلوس للاعيبة اللي موجودة، وما جبتش ولا صفقة جديدة، مع إن عندي كونفدرالية، وكأس مصر بعد خروج الأهلي، ودوري أنا فيه رابع ورايا المصري وقدامي الأهلي وبيراميدز وسيراميكا”.
واستمر: “سيراميكا متصدر الدوري وهيقابلني أول ماتش في الكأس، يعني ممكن أكمل وممكن لأ، اللي موقف الزمالك دلوقتي هو اسمه وجمهوره وبس، الجمهور العظيم هو اللي بيكسبه ماتشات زي المصري وبتروجيت، تخيل إنك تنزل تلعب بتروجيت وإنت مش ضامن تكسب”.
واختتم خالد الغندور تصريحاته قائلاً: “إنك تعتبر الفوز على المصري إنجاز، وتفرح عشان متصدر مجموعة الكونفدرالية، وهي أضعف بطولة في إفريقيا، ده مش لايق بالزمالك ولا بتاريخه، الطبيعي بالشكل ده إن الزمالك يطلع تالت، والإنجاز الحقيقي إنه يطلع تاني”.
