بسبب الحكم محمد معروف.. أحمد موسى يوجه رسالة عاجلة لهاني أبوريدة: “فين العدالة؟”
وجه الإعلامي أحمد موسى، رسالة عاجلة إلى هاني أبوريدة رئيس اتحاد الكرة بسبب سيراميكا كليوباترا وإدارة الحكم محمد معروف ثلاث مباريات له وهو متصدر الدوري.
وقال موسى، خلال تصريحات تليفزيونية عبر برنامج “على مسئوليتي”، على قناة” صدى البلد”: “صدق أو لا تصدق.. سيراميكا كليوباترا متصدر الدوري المصري، من حظه الجميل اللي مبيحصلش إلا في الدوري المصري.. يبقى عندك ثلاث ماتشات فربنا يكرمك بحكم يحكملك ماتشين من الثلاثه”.
وتابع:” اللي هو لو انت روحت افريقيا لا يمكن يحصل فيه كده ولا اسيا ومش عايز اقولك متتكلمش على أوروبا “.
و أضاف موسى:” حكم يحكملك ماتشين من أهم ثلاث ماتشات ليك يا سيراميكا إحنا جايبين ليكم الكابتن محمد معروف .. هو حكم محترم أنا مقولتش حاجه ولكن أنا مستغرب هو انتوا معندكوش غيره”.
وأشار:” إمبارح طرد للاعب سيراميكا ولا عمل أي شئ.. لو اي حكم رجع للفار لا يمكن يطرد، لكن واضح أن في ناس مش عايزة سيراميكا كليوباترا تتصدر الدوري نشوف بيراميدز ولا حد تاني”.
وشدد موسى:” بمناسبة شهر رمضان يا جماعة في عداله.. ادي كل فريق حق متجاملش.. بتجامل ليه، لو عايز محمد معروف يحكم كل ماتشات سيراميكا خلوه يحكمها بقى لنهايه الموسم يعني هو مفيش غيره يحكم الماتشات دي لسيراميكا ما هو في حكام تانيه”
وواصل:” أنا لا بوجه إتهامات ولا حاجه بس دي علامات استفهام.. سؤال لاتحاد الكرة ولجنه الحكام هو مفيش غير محمد معروف”.
و أردف موسى:” لو في اي نادي حكم أدار ليه مباراتين من أصل اخر ثلاث مباريات ليه قولولنا وانا هطلع اقول هنا والله ده اللي بيحصل عملها مع الأهلي مع الزمالك مع المصري مع بيراميدز أن في حكم كل ثلاث مباريات يحكم ماتشين لنادي واحد ”
وأختتم:” أنا بوجه رساله للمهندس هاني أبوريدة.. قولولنا بس هل الكلام ده بيحصل”.
