بعد الفوز أمام المصري- معتمد جمال يوضح سر روح لاعبي الزمالك.. ويؤكد معظم الفريق لعب وهو عنده برد

كشف معتمد جمال المدير الفني لنادي الزمالك، عن سبب أداء اللاعبين امام المصري، وكواليس حواره معهم دائما، وءشار إلى إصابة معظمهم بالبرد.

وقال جمال خلال مداخله هاتفية عبر برنامج “الكورة مع فايق”، على قناة” ام بي سي مصر 2″:” الحمد لله، كلامي دايما مع اللعيبه بمنتهى الهدوء زي ما حضرتك قلت وهما الحمد لله مصدقيني جدا، واللي أنا بقوله بننفذه”.

و أردف: “لما وعدتهم إن كل الناس هتلعب، الحمد لله إحنا في أربع ماتشات كل الناس لعبت باستثناء كام حاجه، لكن في كل المراكز كل الناس لعبت”.

و شدد جمال:” لما الدنيا بتبقى صعبة والظروف مش في صالحنا، برجع أو بسند على جمهور نادي الزمالك اللي هو عمره ما خذلني الحمد لله، وده داعم لينا بشكل كبير جداً”.

وواصل:” أي نادي غير نادي الزمالك في الظروف اللي إحنا بنمر فيها مكنتش هتلاقي الناس دي موجودة، فبشكرهم جداً، تيشرت نادي الزمالك كمان أنا بشتغل عليه لأن التيشرت ده لوحده دافع”.

وزاد جمال:” أنا بشتغل مع الولاد كملعب وفي نفس الوقت في الناحية النفسية عشان ناخد منهم أحسن حاجة. أنا بقول لهم إحنا في معادلة صعبة جداً؛ أنا عايز منك كل حاجة وأنا ما إديتكش حاجة أو ماليش حاجة أديهالك، فالدنيا بتبقى الحمد لله مادام مصدقيني فإحنا بناخد أحسن حاجة في أقل معطيات”.

وبشأن اللاعبين الناشئين ومسؤوليتهم أكد: “الحمد لله، يمكن هم بس كتر خبرة ومجهودهم بيبتدوا يحسوا بالتعب من مباراة لمباراة، ولكن بيدوا لآخر نفس، وأنا الحمد لله حتى لو عملوا أقل من كده أنا راضي بيهم طبعاً لأن أنا رميتهم في النار زي ما بيقولوا”.

و عن حالة المصابين؟ أستأنف جمال:” لسه مش أحسن حاجة، إحنا خدنا دونجا وعبد الله السعيد عشان يعملوا بوش لزمايلهم في المعسكر، لكن كان الاتفاق إنهم يلعبوا 20 أو 25 دقيقة”.

و أستطرد: “اللي الناس ماتعرفوش إن معظم الفرقة كان عندها برد شديد، محمد السيد وناصر منسي وسيف الجزيري خرج عشان البرد، كلهم واخدين مضادات حيوية عشان يكونوا موجودين”.

وانهى:” أنا دايماً بقول إن أنا مشجع قبل ما أكون مدرب، فبإذن الله الفترة اللي جاية هنعمل أحسن حاجة عشان نرجع نادي الزمالك لوضعه الطبيعي”.