تعليق مُثير من شوبير على مشادة عبد الله السعيد وحسام عبد المجيد: “ماسكين سواطير وسيوف ومسدسات”! فيديو

علق الإعلامي أحمد شوبير على المشادة التي حدثت خلال مباراة الزمالك وسيراميكا كليوباترا، والتي انتهت بخسارة الزمالك بنتيجة 2-1 في دور الـ16 من كأس مصر، ليودع البطولة.

وقال شوبير: “موضوع حسام عبد المجيد وعبد الله السعيد، آه حصل خلاف وحصل شد وجذب. أنا بلوم على حسام، لأننا عارفين كويس أدبه وأخلاقه وتربيته. هو نفسه كتب وقال أنا متربي ومتربي جدًا، ومحدش قبل كده اتكلم عنه سواء من زمايله في المنتخب أو النادي إلا بكل احترام”.

وأضاف: “لكن برضه عبد الله السعيد ده واحد من رموز الكرة المصرية، ومن الحاجات الجميلة في تاريخها. سواء أنت أهلاوي أو زملكاوي أو بتشجع بيراميدز أو الإسماعيلي – ودي الأندية اللي لعب فيها في مصر – عبد الله قيمة كبيرة كلاعب كرة قدم”.

وتابع: “حسام أخطأ، آه أخطأ، لكنه اعتذر. دخل أوضة اللبس واعتذر، وباس على دماغ عبد الله، وكتب على السوشيال ميديا وكرر اعتذاره تاني، وحط صورة كبيرة لعبد الله السعيد”.

وأشار شوبير إلى أن: “النادي لو عايز ياخد قرار ياخده، لكن في النهاية اللاعب أخطأ واعتذر. إحنا مش ماسكين سيوف ولا سواطير ولا مسدسات، مش كل غلطة عشان أهلي وزمالك نولع الدنيا ونقطع في بعض. ماينفعش ننصب نفسنا قضاة ونصدر أحكام، ده أمر غير مقبول”.

واختتم تصريحاته قائلًا: “أنا مشكلتي إني صريح. اللي يغلط نقول عليه غلط ويتعاقب، مفيش مشكلة. لكن لما يبقى لاعب مؤدب ومحترم ومشفنالهش أي مشاكل قبل كده، ماينفعش ننسف تاريخه عشان موقف حصل في لحظة انفعال”.