علق مقدم البرامج محمد أبو العلا،على ضغط مباريات الزمالك خلال شهر فبراير، و تعارض الدوري والكأس مع لقاءات الفريق في الكونفدرالية.
وقال أبو العلا، خلال تصريحات تليفزيونية عبر برنامج “زملكاوي”، على قناة” الزمالك”:” الدهشة بقى اللي موجودة النهارده من ساعة ما تم إعلان اتحاد الكورة موعد ماتش الزمالك وسيراميكا كليوباترا اللي هو في دور الـ 16 لكأس مصر، واللي بيقولوا تحدد ميعاده يوم 17 فبراير”.
و أردف:” توقيت غريب جداً تاني يوم الصبح بعد الماتش على طول إمبارح، وإنت عارف إنك داخل على معمعة الفترة القادمة وداخلين بعديها على رمضان، وفجأة يتحط لك ماتش”.
وتابع أبو العلا:” مش عارف مين برضه اللي متخيل فجأة يحط قرار بمباراة في دور الـ 16 لكأس مصر. مباراة على طول كدة قبليها بعديها بـ 10 أيام من دلوقتي إنك مطالب إنك تلعب ماتش في دور مهم في كأس مصر، بطولة من جولة واحدة.. يعني قصة لما تيجي تفكر فيها الحقيقة تلاقي يعني مش مريحة”.
وأشار:” وبعدين زنقك كدة.. برضه الموضوع عليه 100 ألف علامة استفهام.. شوف سيراميكا كليوباترا ممكن يكون مريح قبليها بقد إيه في ماتش مهم، ماتش مصيري، ماتش ما فيهوش عودة، ماتش ما فيهوش قسمة على اتنين و ده مفهوش مبدأ تكافؤ فرص”.
و شدد ابو العلا:” يعني أنا دلوقتي يا جماعة لو هلعّب يوم 8 اللي هو يوم الأحد القادم، وعايزين يقدموا ماتش سموحه من 12 إلى 11 وهلعّب كايزر تشيفز يوم 14، وهلعّب يوم 17 مع سيراميكا، وهلعّب يوم 20 عندي ماتش في الدوري مع حرس الحدود.. أنا بكلمكم على ماتش 8 وماتش 11 وماتش 14 وماتش 17 وماتش 20.. خمس ماتشات في 12 يوم! ده شيء خيالي، ما أعتقدش إن فيه دوري في العالم ممكن لعيب كورة يستحمل يلعب خمس ماتشات في 12 يوم”.
وواصل:” ماتش 11 ده جه منين بقى؟ ده بقى الماتش اللي عليه مشكلة تانية مع رابطة الأندية.. فريق بيلعب بره ملعبه بره مصر، مسافر سفرية طويلة جداً في زامبيا كمان مش مسافر بطيارة خاصة، وحتى لو مسافر بطيارة خاصة مشوار طويل جداً بياخد حوالي 16 ساعة طيران بالترانزيت بالبهدلة اللي بيمر بيها اللعيبة كلها. عدم راحة.. خلصت لسه ماتش إمبارح تسافر النهارده”.
وأكمل أبو العلا:” الموضوع هنا محتاج إن الواحد يفكر هو الهدف من ده كله إيه؟ وإنك تشيل الماتش وتحط الماتش وتقص وتلزق.. غريبة جداً”.
وأكد: “ماتش سموحة لما تقولي إن هو يوم 12 وعندي ماتش 14 ولما تحب تعدلهولي احتمالية لسه فيه كلام داير دلوقتي ماتاكدش، لكن بكلمكم على طريقة التفكير بانهي منطق إن أنا حتى الاحتمالية دي أخليه من يوم 12 خليه يوم 11! الموضوع صعب جداً جداً.. ألعب 8 و11 و14 و17 و20 شيء لا يمكن لعيب كورة أو جسم يستحمله، لا يمكن مع سفر كمان رايح جاي الموضوع الحقيقة محتاج مراجعة كبيرة جداً”.
وأتم:” وعايز أعرف إيه هو جدوى أو ما هو اللي ورا حالة الاستعجال الرهيبة لأنك تحط الماتشات وتصحى الصبح فجأة تفاجئنا كلنا وتحطلي ماتشات تحسسني حتى إن مفيش تكافؤ فرص”.
