وجه حسام المندوة، أمين صندوق الزمالك، رسالة قوية لمجلس إدارة النادي، وتغنى بجماهير الفارس الأبيض الداعم الاول للفريق.
وخلال مداخلة هاتفية للمندوة عبر برنامج “ملعب أون”، عبر قناة “أون سبورت”قال له الإعلامي سيف زاهر:” بعض الجمهور يا فندم برضه، وحضرتك طبعاً من الأكثر خبرة داخل المجلس، بعض الناس بتقول إن جمهور الزمالك عنده عزيمة كبيرة، ولكن يرى في بعض الأوقات -مش بس أزمات مادية- يرى اختلاف في وجهات النظر (عايز أقول اختلاف وليس انقسام) داخل مجلس الإدارة. حضرتك بتشوف ده إزاي؟”
ليرد المندوه: “زي ما قلت لك يا كابتن سيف، فرصة في الفترات الصعبة دي إننا نوحدخ وجهات النظر كلها. ولازم نقول إن اختلاف وجهات النظر شيء وارد، بس إحنا محتاجين نداري على شمعتنا أكتر، محتاجين نتسمك بالسرية أكتر”.
وعاد سيف زاهر وقال : دي رسالة حضرتك بتوجهها لمجلس الإدارة صح؟ بصراحة بتعجبني شجاعتك وصراحتك”.
ليجيب المندوه:” يا كابتن سيف، إحنا من أول لحظة دخلنا فيها النادي قلنا يا جماعة إحنا 12 واحد صعب ننجح لوحدنا، محتاجين الجمهور وأعضاء الجمعية العمومية، ومحتاجين الـ 12 ذات نفسهم يكونوا متحدين على قلب رجل واحد. ربما ساعات بيحصل بعض الاختلافات، ممكن تكون شيء صحي، ولكن لا”.
واستطرد:” محتاجين بالفعل نتكاتف أكتر من كده، نوحد كلمتنا وننكر ذاتنا أكتر وأكتر. وإن شاء الله أنا شايف في أمور مبشرة لسه لم يُعلن عنها، لما يُعلن عنها الجمهور هيشعر بقيمةخ الفترة اللي اشتغلنا فيها دي”.
وأكد سيف زاهر: أنا يا فندم طلبي ورجائي الوحيد هو الاستثمار في نجم الزمالك رقم واحد: الجمهور العظيم اللي مكسر المدرجات. لازم يكون في تقدير من المجلس في المباراة القادمة وتنظيم، لأن الجمهور ده هو اللي بيكسب الزمالك ويستحق”.
و استأنف المندوه: ” هو السلاح الأول والأخير لنادي الزمالك دائماً وأبداً. وإحنا يا سيف جزء من جمهوره، إحنا في الآخر موجودين في الإدارة دلوقتي لكن إحنا من زمن بعيد جزء من الجمهور ده. وإن شاء الله يوم الأربعاء الجاي ويوم السبت إحنا مطلعين أتوبيسات من قدام النادي عشان ننقل الجمهور بشكل مريح جداً، ومتفائلين إن الجمهور هيكون ليه كلمة كبيرة في ماتش كايزر تشيفز ينهي حالة القلق اللي بنتواجد فيها أحياناً”.
وشدد المندوة:” لما بتكلمني عن الجمهور، أنا بتخيل حتى في البعثات اللي كنت برأسها، وبشوف الجمهور اللي بيسافر كيلومترات وساعات طويلة جداً، ويروح هناك يبيتوا 40 و50 واحد مع بعض عشان خاطر يشجع.. هو ده بجد الوقود اللي بيحرك اللعيبة وبيحركنا، وعمرنا ما نقدر نستغنى عنه. الجمهور يستحق كل التقدير لأنه بيشغل في نادي الزمالك بدون أهداف، غير إن الزمالك يكسب ويبسطه. وعشان كده بناشد الجمهور، إحنا كلنا في نفس المركبة، الزمالك بينافس في 3 بطولات وإن شاء الله يكون لنا نصيب فيهم”.
واختتم: “إحنا موجودين في صفوف متقدمة، ومحتاجين دعمكم باستمرار. المشاكل تقيلة جداً وحلولها مش بالسهولة اللي الناس متخيلاها. القضية مش المجلس ده يقعد أو يمشي، إحنا كدة كدة هنمشي في الآخر، لكن القضية إننا عندنا حلم نسيب النادي وهو عنده استقرار”.
