حسام المندوه يكشف سر “الروح الجديدة” للزمالك.. ويوجه رسالة لبيراميدز قبل موقعة الحسم! – فيديو
كشف الدكتور حسام المندوه، أمين صندوق نادي الزمالك، عن الكواليس التي أعادت “هيبة” الفارس الأبيض في الفترة الأخيرة، مؤكداً أن ما يحدث داخل الاستاد حالياً ليس مجرد أداء فني، بل هو “انتفاضة كبرياء” يقودها الجمهور واللاعبون معاً.
وقال المندوة خلال مداخلة هاتفية ببرنامج “ملعب أون”، عبر قناة “أون سبورت”:” أنا بشكرك كابتن سيف زاهر، بشكل شخصي على تحليلك، أنا بسمعه دلوقتي وأنا على التليفون، بسمع دلوقتي اللي بتقوله على لمسة اليد، وبسمع برضه بتقوله على فكرة مافيش ماتش سهل، ماتش صعب دلوقتي، وعايز أشكرك على الدعوات وعايز أشكرك على حاجات كتيرة، وبقولك هارد لاك برضه في نفس الوقت”.
وتابع:” لكن النهاردة أنا حاضر في الاستاد وشكل الجماهير النهاردة وتفاعلها حاجة بجد حاجة تفرح جداً جداً. بتقول كل لما يعني أنا النهاردة بشوف إشارة واضحة جداً إن كل ما الجماهير بتحس إن فرقتها في المنافسة وماتشات صعبة تتواجد أكتر في الاستاد لغاية ما الهدف بتاعنا كلنا يوصل إن الاستاد ده يتملي عن بكرة أبيه، في اللحظة دي نحس بقى إن فعلاً الدوري بتاعنا طعمه مختلف والمنافسة طعمها مختلف والاستثمار طعمه مختلف، حاجات كتيرة جداً تتغير لشكل إيجابي”.
ومن جانبه قال الإعلامي سيف زاهر: أداء الزمالك الحقيقة مختلف تماماً الفترة دي، نوع من الحماس كبير جداً، وحتى اللعيبة اللي كنا بنقول عندها ظروف صعبة ابتدت تتألق، ابتدت الناس تحس إن مافيش أزمات مافيش مشاكل.. هل الأمور المادية أفضل دلوقتي ولا ده روح الجمهور فقط؟
ليرد المندوه:’ هو يعني الكل بيؤدي إلى كله يا كابتن سيف، يعني طبعاً فكرة روح الجمهور ده الشيء الأساسي المهم في المعادلة، الجمهور المحفز الأساسي عشان الفرقة تتحرك بهذا الشكل اللي لازم نشكره بشكل قوي جداً”.
و أضاف: “النواحي المادية برضه المكسب بيخلي الدنيا تبقى أفضل، بتخلي فيه الفلوس يمكن هنا ولا هنا بتدخل برضه المحبين برضه بيكونوا موجودين في اللحظات دي، يعني بتلاقي الدنيا كلها ماشية في اتجاه إيجابي. المكسب دايما بيجيب خير، المكسب دايما بيجيب وراه أمور كتير جداً إيجابية”.
وشدد المندوة:” يعني إن شاء الله كده إحنا ماشيين بشكل كويس، برضه مافيش شك إن وجود معتمد جمال الأصيل دايماً زي ما بحب أقول عليه، معتمد عامل حالة محترمة جداً جداً فأولاد النادي كلهم متجمعين عشان يحدثوا الحالة الإيجابية اللي باسطة الناس كلها دي”.
وردا على سؤال ، بعض الناس بتقول إن ممكن الزمالك الفترة الجاية يحتفظ بلعيبته زي ناصر منسي زي حسام عبد المجيد، ده ممكن يبقى موجود الفترة اللي جاية؟ أجاب: “يعني دلوقتي إحنا دايماً في الأمور دي إحنا مافيش شك في الظروف اللي إحنا فيها برضه والقيد في مشكلة فيه، فطبعاً لازم نفكر في الحفاظ على الفريق كله”.
وأشار المندوة:” يمكن من الحسنات برضه اللي إحنا شايفينها للمأساة اللي إحنا بنعيشها في موضوع القيد اللي باستمرار ده، الوجود اللي بيطلع اللعيبة بقى يعني قطاع الناشئين بيظهر عضلاته في إنه بيطلع لك كل شوية لعيبة مستواهم عالي جداً جداً.
وواصل: “المفروض فعلاً اللعيبة دول يعني يتحوّط عليهم بشكل كويس ويستثمر بشكل إيجابي داخل نادي الزمالك، فإحنا مافيش شك إن إحنا في المرحلة دي التفكير الأساسي والأول إن إحنا نحافظ طبعاً على اللعيبة اللي موجودة وعينينا برضه على قطاع الناشئين باستمرار ها.. هتوردوا لنا مين تاني للفريق الأول عشان نمشي على نفس الوتيرة دي باستمرار يعني”.
وسأله سيف زاهر: يعني أنتوا القصة دي عجبتكم خلاص؟ وييجيب المندوة:” يعني بيني وبينك أنا بشكل شخصي يعني أنا مرتاح لها يعني، أمين الصندوق مرتاح لها جداً الحكاية دي، يعني هتوفر فلوس وبتبين أهمية إن إحنا برضه نركز مع قطاع الناشئين وفي نفس الوقت بتحل لنا مشكلة كبيرة جداً جداً، فكرة الحماس بتاع واحد طالع من تحت بقى والجمهور بيستقبله فبيأدي بالأداء الكويس، يعني أظن إحنا اتكلمنا قبل كده مرة على الناشئين اللي طلعوا وقد إيه مستواهم رائع وقد إيه حماسهم رائع، فاعتقد حالة إيجابية محتاجين نحافظ عليها باستمرار”.
وبشأن مباراة بيراميدز القادمة؟ أكد: “بقت المباراة دلوقتي الأهم في الدوري الممتاز، يعني بقت مباراة مهمة لأن كل أسبوع دلوقتي الأهلي بيكسب من حتة، بيراميدز بيكسب، الزمالك بيكسب، خلاص الفروقات بقت نقطة هما الاتنين رايحين يلاعبوا بعض”.
و أردف المندوة:” مافيش ماتش سهل ماتش صعب، لا يعني أنا شايف إن أنا محتاج كل ماتش أركز فيه إنه هو ماتش حسم الدوري، كل ماتش أفكر فيه بهذا الشكل، لأن ماتشات مهمة جداً. الماتش النهاردة كان ماتش مهم جداً جداً جداً، الماتش بتاع الحرس كان ماتش مهم جداً جداً جداً، الماتش اللي جاي ماتش بيراميدز ماتش مهم جداً جداً”.
وزاد: “بنفس التفكير ده بنفس المجهود بنفس الحماس اللي موجود بنفس التركيز إن شاء الله برضه نتخطى ماتش بيراميدز زي ما تخطيناه قبل كده كتير يعني، ولكن ماتش مهم ماتش صعب فرقة محترمة جداً بشكل كبير”.
و أستانف :” مش عايزين بقى نحط إيه عراقيل نفسية قدامنا ونقول الماتش اللي جاي وكده، كل الماتشات صعبة وبالروح دي بإذن الله إحنا قادرين إن إحنا نجتاز أي مباراة قادمة. إحنا عاوزين نستثمر الروح دي اللي موجودة حالياً إن شاء الله هنتخطاها. والأهم من ده برضه إن يمكن كل المحللين ماكنوش متوقعين الأداء ده، وإن زي ما كده ماشيين أسبوع بأسبوع كل شوية الأول يبقى التالت، والتالت يطلع التاني، والتاني يطلع”.
واختتم:” يعني في الحماسة اللي موجودة دي عاملة روح جميلة في الدوري العام، فأنا شايف إن العملية المفروض تكون بالعكس، ده هما شايفين إن الزمالك إيه اللي بيعمله ده في الفترة الحالية، فإن شاء الله برضه نحافظ عليها بإذن الله ونجتاز برضه الخطوة الصعبة بتاعة بيراميدز إن شاء الله”.
شاهد:
